Այսօր կառավարության նիստից առաջ վարչապետ Կարեն Կարապետյանն անդրադարձավ բազմաբնակարանային շենքերի կառավարման ոլորտի խնդիրներին: Վարչապետն ասաց, որ առկա համատիրությունների մեծ մասը ոչ արդյունավետ է, կամ ընդհանրապես բացակայում են. «Մենք կայացած համատիրություններ չունենք: Մենք պետությունով այս հանձնարարականի հիման վրա լայնամասշտաբ ծրագիր ենք անելու համայնքներում, որ մի անգամ բոլոր շենքերի խնդիրները լուծենք, հայտարարենք, որ վերջին անգամ ենք լուծում եւ այդ համատիրությունները այնպես կայացնենք, որ դրանից հետո էդ համատիրությունն աշխատի: Պետք ա շատ համարձակ ռեֆորմների գնանք ըստեղ: Համատիրությունը կոլեկտիվ մի մարմին ա, որտեղ ոչ պատասխանատվություն կա, ոչ էլ կառավարման որակ: Դա ինչ-որ անհասկանալի մի բան ա: Այդ իսկ պատճառով մենք պետք է համատիրության կառավարիչների այդ ինստիտուտը ստեղծենք, մեծացնենք, բայց դա գալու է բնակիչների շատ համարձակ լինենք»:
Վարչապետը հանձնարարեց երկու ամսում մշակել ծրագիր եւ տեղեկատվություն ներկայացնել համատիրությունների, բազմաբնակարան շենքերի, նկուղների, տանիքների, աստիճանավանդակների մուտքերի եւ այլնի մասին:
Նելլի ԲԱԲԱՅԱՆ
