Քաղցրաշենցիները այսօր կրկին կառավարության շենքի առաջ էին, չնայած այն բանին, որ նրանց խոստացել էին հանձնած խաղողի դիմաց «Վինար» ընկերության ունեցած պարտքերը ամբողջությամբ մարել: Այսօր նրանք կրկին ձեռնունայն էին եկել: Պետական եկամուտների կոմիտեն «Վինար» ընկերության պահեստներում եղած սպիրտը կապարակնքել էր, որպեսզի այն վաճառեն եւ գյուղացիների պարտքերը մարեն:
Սակայն այսօր քաղցրաշենցիների հետ հանդիպած գյուղատնտեսության փոխնախարար Ռոբերտ Մակարյանն ասաց, որ սպիրտի լաբորատոր հետազոտության արդյունքում պարզվել է, որ այն շատ ցածր որակի է եւ որեւէ ընկերություն, ում հետ որ պայմանավորվել էին սպիրտն իրացնել, չի ցանկացել այն գնել:
Ռոբերտ Մակարյանի այն պնդումներին, թե «Վինարի» սեփականատերը որոշ գումար բաժանել է, քաղցրաշենցիները վստահեցրին, որ պարտք ունեցող գյուղացիներից մեկ տոկոսին է այն հասել, մնացածը մարզպետի, միլպետի, բարեկամների հարցերն են լուծել:
Կարդացեք նաև
Մեր այն հարցին, թե ի՞նչ գումար է բաժանվել, Ռոբերտ Մակարյանը պատասխանեց, որ սեփականատերը վարկ է վերցրել, որ գյուղացիների պարտքերը մարի: Ռոբերտ Մակարյանը նաեւ ասաց, որ այսօր «Վինարի» սեփականատերը խոստացել է որոշ գումար տրամադրել եւ գյուղացիների մի մասի պարտքերը մարել, սպասում են:
Այս պահին քաղցրաշենցիները սուլոցներով փորձում են կառավարության պատասխանատուների ուշադրությունը հրավիրել իրենց բողոքի ցույցին: Հարցին՝ վարչապետը տեղյա՞կ է, որ «Վինարի» սեփականատերը չի կատարել խոստումը, Ռոբերտ Մակարյանն ասաց, որ նախարարն այսօր վարչապետին կասի այդ մասին:
Լուսինե ԲՈՒԴԱՂՅԱՆ
