21-րդ դարի պետություն թե՞ միջնադարյան կրոնական համայնք

21-րդ դարի պետություն թե՞ միջնադարյան կրոնական համայնք

Ամեն օր լսում ենք ճանապարհատրանսպորտային վթարների և զոհերի մասին:

Պատճառը՝ Հայաստանի ճանապարհների և փողոցների քանդուքարափ վիճակն է, մեքենաների ոչ սարքին լինելը, վարորդների անպատասխանատվությունը և այլն:

Փոխանակ այս ամեն ինչը կարգի բերելու. ամեն մեքենայի դիմային հայելուն խաչ է կախված ապակիներին սրբապատկերներ: Հայաստանի ճանապարհների տարբեր հատվածներում հսկայական խաչեր են տեղակայված և վարորդները դրանց կամ եկեղեցիների մոտով անցնելիս, ղեկը բաց են թողնում ու խաչակնքում…

Ամեն տարի լսում ենք կարկտահարությունից, կամ երաշտից տուժած այգիների, ցանքատարածությունների մասին:

Պատճառը՝ հակակարկտային ցանցերի, ջրանցքների, ոռոգման կաթիլային համակարգերի բացակայությունն է և այլն:

Փոխանակ այս ամենը կարգի բերելու, ՀՀ գյուղնախարարը կղերականների հետ գարնանը օրհնում են հողն ու օդը, աղոթելով բարձր բերք:

Հայաստանի համարյա բոլոր բնակավայրերը կիսավեր վիճակում են, հաճախ չեն գործում մանկապարտեզները, դպրոցները, մշակույթի տները, բայց ամեն տեղ վեր են խոյանում նորակառույց եկեղեցիներ:

Միջնակարգ դպրոցը աշակերտներին չի տալիս ժամանակակից կրթություն, ազատ մտածողություն, քննադատական միտք, փոխարենը պարտադիր անցնում են քրիստոնեական դաստիարակություն, կրոնական դոգմաներ, աղոթել և աշխարհի ծագման կղերական թեզերը: Էլ ինչ գիտություն, ինչ առաջընթաց:

ՀՀ զինված ուժերը համալրված են 80-ականների զենքերով, շարունակվում են ոչ կանոնադրական հարաբերությունների պատճառներով հանցագործությունները: Փոխանակ այս ամենը կարգի բերելու, նորակոչիկներին խմբերով տանում են մկրտության, զորամասերում կղերականները (որոնք ի դեպ ազատված են զինվորական ծառայությունից) հոգևոր դաստիարակություն են իրականացնում, դիրքեր գնալուց ստիպում զինվորներին խաչակնքել….

Հ. Գ. Փոխանակ Պետություն կառուցենք, փորձում ենք փրկվել Նոյան տապան կառուցելով:

 

Ավետիք ԻՇԽԱՆՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք