«Ժառանգություն» կուսակցության վարչության անդամ Սուսաննա Մուրադյանը դժվարանում է ասել, թե հատկապես ինչը ՕՐՕ դաշինքում դուր չի եկել «Ժառանգության» առաջնորդ Րաֆֆի Հովհաննիսյանին:
Հիշեցնենք, որ «Շանթ» հեռուստաընկերությանը տված հարցազրույցում Րաֆֆի Հովհաննիսյանը հայտարարել էր, թե «ՕՐՕ-ն իմ սրտով չէր, բայց ես «Ժառանգության» վարչությունում փոքրամասնություն էի, այդ է պատճառը, որ առանց ավելորդ հույզերի ու դուռը շրխկացնելու ես կրեցի այդ պատասխանատվությունը… որոշ բաներ իմ սրտով չէին, բայց հպարտ եմ, որ գեներալ Օհանյանի ու Օսկանյանի հետ ընդհանուր ճանապարհ անցանք»:
«Չեմ կարող ասել՝ Րաֆֆի Հովհաննիսյանին ինչը դուր չեկավ, ինչը նրա սրտով չէր դաշինքում, ուղղակի տեսնում եմ՝ ՕՐՕ դաշինքի հիմնադիրների՝ Օհանյանի, Օսկանյանի, Հովհաննիսյանի ու ակտիվների միջեւ շարունակվում են մարդկային ու մնացած հարաբերությունները»,- ասաց Սուսաննա Մուրադյանը: Նա՝ ընտրություններին դաշինքով մասնակցելու կողմնակիցների թվում «Ժառանգությունում» մեծամասնության մեջ էր:
«Կան ե՛ւ օբյեկտիվ, ե՛ւ սուբյեկտիվ պատճառներ, կարելի էր ընտրություններին առանձին գնալ կամ դաշինքով, բայց որեւէ երաշխիք չկար, որ առանձին գնալու դեպքում հաջողության կհասնեինք, եւ այդ պատճառով հիմա անհաջողությունը բարդել նրա վրա, որ դաշինքով գնացինք, այդ պատճառով այդպես եղավ, չեմ կարող, որովհետեւ վստահ չեմ, որ առանձին գնալու դեպքում հաջողություն կունենայինք, գուցե հինգ մանդատ լիներ, բայց դա հաջողություն չէ հաստատ, որովհետեւ հինգ մանդատով որեւէ բան չէինք կարողանալու փոխել, ինչպես քվեարկություններն են ցույց տալիս»,- հավելեց «Ժառանգության» վարչության անդամը:
Արփինե ՍԻՄՈՆՅԱՆ
