Իրանագետ Արմեն Իսրայելյանի մեկնաբանմամբ ՀՀ նախագահի այցելությունը Իրան կարեւոր էր թե՛ քաղաքական, թե՛ տնտեսական, թե՛ անվտանգության առումով:
«Քաղաքական առումով կարեւոր էր, որովհետեւ նախ Հարավային Կովկասում Հայաստանը ներկայացվեց բարձր մակարդակով, սա նաեւ ուղերձ էր Իրանի նորընտիր իշխանություններին, որ Հայաստանը հավատարիմ է Իրանի հետ հարաբերությունները զարգացնելու վերաբերյալ արած հայտարարություններին ու պատրաստ է կյանքի կոչել վերջին տարիներին ձեռք բերված պայմանավորվածությունները»,-այսօր «Հայացք» ակումբում ասաց Արմեն Իսրայելյանը:
Նրա համոզմամբ, պաշտոնական Երևանի այս քայլը կգնահատվի Իրանի կողմից, դրա մասին, ըստ նրա, վկայում են նաև իրանական լրատվամիջոցների դրական հրապարակումներն ու վերլուծությունները հայ-իրանական հարաբերությունների զարգացման մասին:
«Տնտեսական առումով նախագահի այցը կարեւոր էր նրանով, որ բարձր մակարդակով երկու երկրների ղեկավարները հնարավորություն ունեցան քննարկել տնտեսության ոլորտում այն հարցերը, որոնք առաջիկայում պետք է իրագործենք»,- շարունակեց պարոն Իսրայելյանը՝ շեշտելով, որ Իրան կատարած այցի ընթացքում քննարկված հարցերը վերաբերում էին բազմաթիվ ոլորտների.
«Անվտանգության վերաբերյալ շատ կարևոր էր Իրանի նախագահի հայտարարությունը Լեռնային Ղարաբաղի խնդրի մասին: Սերժ Սարգսյանի հետ հանդիպման ժամանակ Ռոհանին հայտարարեց, որ Իրանն ամեն ինչ անելու է՝ թույլ չտալու իր սահմանների մոտ ապակայունացում: Սա առաջին հերթին կարևոր ուղերձ էր` ուղղված Ադրբեջանին…Եթե նախկինում Ադրբեջանի հետ հարաբերություններում շեշտը դրվում էր տնտեսական բաղադրիչի վրա՝ շատ դեպքերում մի կողմ թողնելով անվտանգության վերաբերյալ հարցերը, հիմա ես կարծում եմ, որ Իրանը վերանայելու է իր այդ քաղաքականությունը»:
Արփինե ՍԻՄՈՆՅԱՆ