Սոչիում Սերժ Սարգսյան-Պուտին հանդիպումից հետո քաղաքագետները ուշադրություն հրավիրեցին այն հանգամանքի վրա, թե ինչպես է ՌԴ նախագահին դիմելիս ՀՀ նախագահն ասել՝ ողջունում եմ երկու սուվերեն պետությունների ղեկավարների հանդիպումը: «Ինտեգրացիա եւ զարգացում» հետազոտական-վերլուծական կազմակերպության նախագահ Արամ Սաֆարյանը կարծիք էր հայտնել, որ Հայաստանը ԵԱՏՄ է մտել հենց իր սուվերենությունը պահպանել-պաշտպանելու համար, ու նախագահ Սերժ Սարգսյանի նման դիմելաձեւը պատասխան է ԵԱՏՄ-ին դեմ արտահայտվողներին:
«Առավոտի» հետ զրույցում «Ժառանգություն» կուսակցության փոխնախագահ Արմեն Մարտիրոսյանը մեր հարցին՝ այդ ողջույնի մեջ դրական բան չե՞ք տեսնում, սրանով Սերժ Սարգսյանը չէ՞ր ուզում ընդգծել, որ ԵՏՄ մտնելով՝ մենք մեր ինքնիշխանությունը չենք կորցնում, պատասխանեց. «Բացարձակ: Եթե նույնիսկ Սերժ Սարգսյանը Պուտինին դիմեր, ասեր՝ աշխարհի թիվ մեկ պետության կողմից ողջունում եմ աշխարհի 120-րդ պետությանը, մեր հարաբերությունները մենք գիտենք՝ ինչպիսին են: Նույն ձեւ Սերժ Սարգսյանն ասում է, որ մենք այստեղ արդարադատության համակարգ ենք ստեղծելու, 2008-ին անհասկացողության պատ էինք քանդում, նոր ատոմակայան էինք սարքում, տնտեսապես զարգանում ենք: Բայց թե ուր ենք զարգանում՝ չենք հասկանում, դպրոցներ են օպտիմալացվում, կրթության նախարարը զգուշացնում է խնդիրների մասին, իսկ թե այդ խոսքերը՝ ոնց են Պուտինին ողջունում, ինչ են իրար ասում, էական չէ: Ես ուրիշ ողջույն եմ հիշում՝ Սերժ Սարգսյանի մեծ շնորհակալությունը Պուտինին՝ նախագահական ընտրություններում մեծ աջակցության համար»:
ՀՌԻՓՍԻՄԵ ՋԵԲԵՋՅԱՆ
«Առավոտ»
30.08.2017
