Ռուսաստանի ԱԳՆ-ն մեկնաբանել է ԵԱՀԿ ՄԽ նոր ամերիկացի համանախագահի նշանակումը. (Տեսանյութ)

Ռուսաստանի ԱԳՆ-ն մեկնաբանել է ԵԱՀԿ ՄԽ նոր ամերիկացի համանախագահի նշանակումը. (Տեսանյութ)

Ռուսաստանի արտգործնախարարության մամուլի խոսնակ Մարիա Զախարովան այսօր տեղի ունեցած ճեպազրույցում խոսել է ԵԱՀԿ ՄԽ արդեն նախկին ամերիկացի համանախագահ Ռիչարդ Հոգլանդի վերջին հայտարարության, նոր համանախագահի նշանակման և Հայաստանի և Ադրբեջանի արտգործնախարարների հնարավոր հանդիպման մասին:

«Այն հայտարարությունները, որոնք մեջբերվել են, նոր չեն. դրանց վրա բազմիցս հղում են կատարել Ռուսաստանի, ԱՄՆ-ի և Ֆրանսիայի նախագահները՝ Լեռնային Ղարաբաղի կարգավորման վերաբերյալ իրենց համատեղ հայտարարություններում»,- ասել է նա՝ նկատի ունենալով Արցախի հակամարտության լուծման հնարավոր տարբերակների վերաբերյալ Հոգլանդի հայտարարությունը:

Ինչ վերաբերում է նոր համանախագահի նշանակմանը, Զախարովան հույս է հայտնել, որ թարմացված կազմով համանախագահները կշարունակեն իրենց ջանքերը և թիմային մոտեցումը, որը միշտ բնորոշ է եղել եռյակին, կպահպանվի:

ԱԳՆ խոսնակը նաև անդրադարձել է ԵԱՀԿ ՄԽ հերթական մոնիթորինգի ժամանակ հրադադարի խախտման դեպքին՝ նշելով, որ «դրան պետք է գնահատական տան փորձագետները՝ ուսումնասիրելով հանգամանքները տեղում»:

«Ռուսաստանն իրավիճակի սրացման կամ այլ բարդացումների ժամանակ միշտ կոչ է անում կողմերին ցուցաբերել հավասարակշռված միտեցում, որի նպատակն է ոչ թե թեժացնել իրավիճակը, այլ հանգեցնել քաղաքական կարգավորման»,- ասել է նա:

Զախարովան նաև նշել է, որ իրենք որևէ տեղեկություն չունեն Հայաստանի և Ադրբեջանի արտգործնախարարների հանդիպման վերաբերյալ:

«Հենց որ այդ մասին տեղեկություն ունենանք, տեղյակ կպահենք»,- ասել է նա:

Մարիա Զախարովան չի պատասխանել ԼՂ-ն բանակցությունների սեղան վերադարձնելու հարցին՝ նշելով, որ այդ հարցում Ռուսաստանի պաշտոնական դիրքորոշումը հայտնի է:

Պատրաստեց՝ Վիկտորյա ԱՆԴՐԵԱՍՅԱՆԸ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք