Այսօր ֆինանսների նախարար Վարդան Արամյանն անդրադառնալով ԱՄՆ-ի հետ կրկնակի հարկումը բացառող համաձայնագրի կնքմանն՝ ասաց, որ իրենց ԱՄՆ-ի գործընկերների հետ այս հարցում ունեն տարակարծություն` արդյոք իրավաչա՞փ է այդ համաձայնագիրը եւ մեր տնտեսվարողները կարո՞ղ են առաջնորդվել դրանով. «Մենք այդ կարծիքը չենք կիսում, որ ԽՍՀՄ ժամանակ կնքված համաձայնագիրը կիրառելի է: Հայաստանը ԽՍՀՄ իրավահաջորդը չէ, նախկինում, այն ժամանակ համաձայնագիրը կնքվել է 70-ական թվականներին և ներկայումս կիրառելի չէ»,-ասաց Վարդան Արամյանը, որն այսօր ֆինանսական տարին ամփոփելու նպատակով ասուլիս էր հրավիրել:
«Հարկման համակարգերը եւ ընդհանուր սկզբունքները շատ կարեւոր են տնտեսվարողների համար, որպեսզի առեւտրային հարաբերությունների մեջ մտնեն եւ ներդրումներ կատարեն: Եթե չկա նման համաձայնագիր, հնարավոր է երկու երկրում էլ հարկվի: Սեպտեմբերի 29-ին այս հարցով խորհրդակցություն ենք իրականացնելու տնտեսվարողների հետ: Այս հարցում մենք մեծ անելիքներ ունենք, որ համոզենք մեր ամերիկյան գործընկերներին, որպեսզի համաձայնագիրը կնքենք»:
Լուսինե ԲՈՒԴԱՂՅԱՆ
