«Պետք չէ խոսակցություններն իջեցնել այն մակարդակի, որ երեխային կոնֆետ չգնելն ընտանեկան բռնություն է». Արման Ղարիբյան

«Պետք չէ խոսակցություններն իջեցնել այն մակարդակի, որ երեխային կոնֆետ չգնելն ընտանեկան բռնություն է». Արման Ղարիբյան

«Իրավունքի ուժ» իրավապաշտպան հասարակական կազմակերպության համահիմնադիր Արման Ղարիբյանը համոզված է, որ ՀՀ-ում վաղուց պետք է ընդունված լիներ «Ընտանեկան բռնության կանխարգելման մասին» օրենքի նախագիծը, եւ այժմ քննարկվող օրինագիծն ուշացած է: Aravot.am-ի հետ զրույցում նա հիշեցրեց, որ ՀՀ-ն վավերացրել է ՄԱԿ-ի եւ Եվրոպայի խորհրդի համապատասխան կոնվենցիաները՝ որոնցով եւ պարտավորվել է պաշտպանել կանանց իրավունքները, այդ թվում՝ պաշտպանել նրանց նաեւ ընտանեկան բռնությունից:

«Տարեցտարի ոստիկանությունն ընտանեկան բռնության դեպքերի մասին ավելի մեծ թվով ահազանգեր է ստանում, նաեւ մահվան դեպքեր են գրանցվել, ուստի այդ օրինագծի կարիքը տարեցտարի ավելացել է: Մեր հասարակությունում եւս ընտանեկան բռնություն կա, հետեւաբար՝ կարիք կա նաեւ օրենսդրական կարգավորման: Չեմ պատկերացնում որեւէ ազգային մտածելակերպ, որն արդարացնում է բռնությունը: Այն չի կարող տեղ ունենալ որեւէ հասարակությունում: Բռնության դեմ պետք են ոչ միայն օրենքներ, այլեւ կրթական ծրագրեր, հասարակության հետ աշխատանք»,-նշեց Արման Ղարիբյանը:

Թե որն է «ընտանեկան բռնություն» երեւույթի բնորոշումը, Արման Ղարիբյանի խոսքով՝ Արդարադատության նախարարությունն այդ հարցում բավարար պարզաբանումներ ներկայացրել է. «Թե օրինագծի այս կամ այն կետը որքանով է խնդրահարույց, դա պետք է քննարկեն միայն մասնագետները, ոչ թե խոսակցություններն իջեցնեն այն մակարդակի, որ «եթե ծնողը երեխային կոնֆետ չգնի, դա կհամարվի ընտանեկան բռնություն, եւ երեխային ծնողից կվերցնեն-կտանեն ապաստարան»…նման խոսակցությունները չէի ցանկանա մեկնաբանել, որովհետեւ դրանցում չկա քննադատություն, դրանք գիտակցված ապատեղեկատվություն են եւ բամբասանք»:

Արման Ղարիբյանի համոզմամբ՝ Արդարադատության նախարարությունը մասնագիտական հարթության վրա կարող է հաշվի նստել այն հասարակական կազմակերպությունների հետ, որոնք խնդիրներ են տեսնում օրինագծում եւ  նախարարությանն առաջարկներ անում. «Իսկ այն անձանց, որոնք անհեթեթ պատճառաբանություններով են խոսում օրինագծի մասին, նախարարությունը, կարծում եմ, չափից շատ է նրանց լսել»:

Մեր զրուցակցի բնորոշմամբ. «Հայտնի եւ անհայտ անձինք նաեւ քաղաքական պատճառներով են ընդդիմանում օրինագծին, ինչի մասին չէի ցանկանա խոսել: Պարզապես, գուցե նրանք որոշակի ծրագիր ունեն եւ պարտավոր են այդպես գործել»:

Լուիզա ՍՈՒՔԻԱՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք