«Գյումրին առանց տնակների» հիմնադրամն անօթևան ընտանիքներին սոցիալական բնակարաններով ապահովելու նպատակով պատրաստվում է անցկացնել ամենաերկար բրդուճի փառատոն Գյումրու Ռուսթավելու անվան փողոցում (խոսքը վարչապետ Կարեն Կարապետյանի`«Կումայրի» արգելոցը տուրիզմի կենտրոնի վերածելու ծրագրով բարեկարգված փողոցի մասին է Ա․Ն․), ինչպես նաև բարեգործական ընթրիք Սրբազանի հետ։
Aravot.am-ի հետ զրույցում հիմնադրամի գործադիր տնօրեն Ղարիբ Հարությունյանն ասաց, որ հրավիրելու են տարբեր կազմակերպությունների և համայնքների՝ մասնակցելու ու պատրաստելու ամենաերկար բրդուճը՝ 750 մետրանոց, որը կարող են ձեռք բերել մասնակցող հյուրերը ու հասույթը փոխանցել հիմնադրամին։ Նախատեսվում են նաև համերգային, պարային համարներ, աճուրդներ։
«Մյուս միջոցառումը բարեգործական ընթրիքն է Սրբազանի հետ, այն ընդունված ձև է միջոցների հայթայթման, նախնական պլանավորել ենք անցկացնել Չերքեզի ձորում, Սրբազանը մասնակցում է ընթրիքի, կլինեն աճուրդներ ու հասույթը կուղղվի հիմնադրամին»,-ասաց Ղարիբ Հարությունյանը։
Մինչ այս միջոցառումների իրականացումը, «Գյումրին առանց տնակների» հիմնադրամի անձնակազմը վաղվանից կայցելի տարբեր կառույցներ՝ հորդորելով աշխատակիցներին իրենց լուման ունենալ անօթևանության դեմ պայքարում, երկրաշարժի 30-ամյա տարելիցին վերջնականապես ազատվել տնակներից։ Հանդիպումների շարքը կսկսվի Գյումրի բժշկական կենտրոնից։
Նունե ԱՐԵՎՇԱՏՅԱՆ
