«Հանուն Հայաստան պետության» ճակատի այսօրվա քննարկման ժամանակ կարծիքներ հնչեցին, որ մինչեւ ապրիլ, երբ Հայաստանը կանցնի խորհրդարանական կառավարման համակարգի, անհրաժեշտ է քայլեր ձեռնարկել: ԱԻՄ անդամ Գագիկ Սարուխանյանը նշեց. «Կրեմլյան գործակալները զավթել են իշխանությունները, թեեւ նրանց ազգանունները «յան»-ով են վերջանում:Եթե նրանց տերերը հրահանգեն կործանել ՀՀ-ն, նրանք դա կանեն»: Սարուխանյանը համոզմունք հայտնեց, որ գուցե պետք է միջկուսակցական հարաբերությունների հանձնախումբ ստեղծել:
«Ժողովրդավարական հայրենիք» կուսակցության ղեկավար Պետրոս Մակեյանն էլ հավելեց, որ մինչեւ ապրիլ քաղաքական ընդդիմությունը պետք է համախմբվի, միավորի նաեւ մտավորականներին՝ ներկայիս իշխանությունների վերարտադրման գործընթացը կանխելու համար:
Քննարկմանը ներկա ԱԺ «ԵԼՔ» դաշինքի պատգամավոր Նիկոլ Փաշինյանն էլ հայտարարեց. «Մարտ-ապրիլին սպասվող գործընթացներով ՀՀԿ-ն եւ նրա արբանյակ-կուսակցությունները փորձելու են հաստատել բրեժնեւյան տիպի վարչակազմ: Դա կանխելու միայն մեկ տարբերակ կա, դա ժողովրդի կամքի արտահայտումն է»:
Լուիզա ՍՈՒՔԻԱՍՅԱՆ
Միավորվելուց առաջ հիշեք Գեղամյանին…