«Ագրարագյուղացիական միավորման» նախագահ Հրաչ Բերբերյանը պատրաստվում է դիմել Համաշխարհային բանկին՝ գյուղատնտեսության նպատակով այս կառույցի հատկացրած վարկերը, որոնք այս տարիների ընթացքում կազմել են մոտ 60 միլիոն դոլար, նպատակային օգտագործվեն: Պարոն Բերբերյանի խոսքով, դրանք չափազանց բարձր տոկոսներով են հատկացվում գյուղացիներին, ինչի պատճառով Հայաստանի գյուղերի 90 տոկոս գյուղացիները վարկերի տակ «ճռռում» են:
«Համաշխարհային բանկը վարկը տրամադրել է 0,75 տոկոսով, բայց գյուղացուն հասցվեց 24 տոկոսով: Բանկերը թալանեցին գյուղացուն: Ես կարծում եմ, որ 5-6 տոկոսով այդ վարկը կարելի էր հասցնել գյուղացուն»:
Մեր այն դիտարկմանը, թե գյուղացիները շատ հաճախ գյուղվարկերը սպառողական վարկի տեղ են օգտագործում, պարոն Բերբերյանն ասաց, որ անգամ այդ վարկերով տաքսի ծառայություններ են բացել:
Այսօր «Բլից ինֆո» մամուլի ակումբում պարոն Բերբերյանը խոսեց նաեւ գյուղացիներին մտահոգող ոռոգման խնդրից: Գյուղոլորտի մասնագետները կարծիք էին հայտնում, որ այս տարի ձյան բացակայության պատճառով գյուղացիները ոռոգման լուրջ խնդիրներ են ունենալու: Սակայն Հրաչ Բերբերյանը փարատեց այս անհանգստություններն՝ ասելով, որ փետրվար ամսին մարզերում տեղացած ձյունը իրավիճակը փրկել է. ջրամբարները կլցվեն:
Պարոն Բերբերյանի խոսքով, գյուղացիների բերքը ոչ այնքան ոռոգումից, որքան ցրտահարությունից կտուժի:
Գյուղոլորտի մասնագետը գտնում է, որ գյուղացու բերքը լիարժեք պաշտպանված կլինի այն ժամանակ, երբ ոլորտի նկատմամբ համակարգային մոտեցում ցուցաբերվի՝ սկսած գյուղմթերքի մասին օրենքի ընդունումից, վերջացրած ապահովագրությունով: Ըստ նրա, հակակարկտային ցանցերն էլ ցրտահարությունը 2-3 աստիճանով կմեղմեն:
Լուսինե ԲՈՒԴԱՂՅԱՆ
