Ռազմաքաղաքական վերլուծաբան Հայկ Նահապետյանը վստահեցնում է, որ «Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանի մեղադրանքն իրեն ուղղված հերյուրանք է, իրականությանը չի համապատասխանում:
Հիշեցնենք, որ Սեֆիլյանը Նահապետյանին մեղադրում է իրեն ֆիզիկապես ոչնչացնելու միջնորդավորված սպառնալիք հասցնելու մեջ:
Երևանի ընդհանուր իրավասության դատարանի Շենգավիթի նստավայրում Ժիրայր Սեֆիլյանի ու մյուսների գործով դատական նիստին նախօրեին Սեֆիլյանն իր պաշտպանական ճառում հայտարարել էր, որ իրեն ֆիզիկապես ոչնչացնելու սպառնալիք է եղել հետևյալ խոսքերով. «Դադարեցրու քո քաղաքական գործունեությունը, ապա թե ոչ՝ ռուսները որոշել են սպանել քեզ»:
Aravot.am-ի հարցին, թե Սեֆիլյանն ինչու պետք է անհիմն զրպարտեր Նահապետյանին, վերջինս պատասխանեց՝ հարցի հասցեատերը նա է, որը նման հայտարարություն է արել, ինքը գիտի ինչու է ասել ու ինչու այս փուլում: Հայկ Նահապետյանը Ժիրայր Սեֆիլյանի այդ հայտարարությունից չի զարմացել.
«Զարմանք չէ, զայրույթ է առաջացրել այդ հայտարարությունը, որովհետեւ եթե անձի նկատմամբ ոչ ճիշտ տեղեկատվություն է տարածվում, ու այն էլ մի անձի կողմից է տարածվում, որը ինձ հարազատ է եղել, պարզապես զայրացնում է: Այն, ինչ ճառի մեջ ասվել է բառացի, այդ բառացի գրվածը թող ապացուցեն, այդ ապացույցներից հետո, բնականաբար, կմեկնաբանեմ, կխոսեմ, անհրաժեշտություն լինի, ես ինչ-որ բաներ կներկայացնեմ: Այն անձը, ում զրպարտում են, պարտավոր չէ իր անմեղությունը տարածել, այլ զրպարտանք տարածողը պետք է ապացուցի, հիմնավորի իր ասածի ճշմարտացիությունը»:
Հայկ Նահապետյանի խոսքով, ինքը վերջին անգամ Սեֆիլյանի հետ զրուցել է 2012-ի վերջին. «Մենք տարաձայնություններ ունեցանք իրավիճակի գնահատականի, այդ իրավիճակից դուրս գալու ելքերի ու ճանապարհների վերաբերյալ, ինչից հետո մեր ճանապարհները բաժանվեցին»:
Արփինե ՍԻՄՈՆՅԱՆ
