Երկրապահ պատգամավոր, Փախստականների վարչության ղեկավար Հովհաննես Ահարոնյանը դեմ է քվեարկել Ընտրական օրենսգրքի երկրապահական տարբերակին։ Ինչո՞վ է դա պայմանավորված։ Հ. Ահարոնյանի պատասխանն այսպիսին էր. «Երեք տարի է նույն բանն եմ ասում։ Իմ քվեարկության կոճակները ճիշտ չեն աշխատում։ Մինչ ուզում եմ քվեարկել՝ արդյունքը տեսնում եմ ցուցատախտակին։ Հաճախ քվեարկությունը կատարվում է իմ կամքից անկախ»։
ՎՈԼՉԻՉԸ ՏԵՐ-ՊԵՏՐՈՍՅԱՆԻ ՄԱՍԻՆ
Իտալացի սոցիալիստ Դմիտրու Վոլչիչի գլխավորած պատվիրակությունը, որը ժամանել է Եվրախորհրդից, հանդիպել է նաեւ Լեւոն Տեր-Պետրոսյանին։ Նա մասնավորապես պատմեց. «Մենք նրան ասում ենք, որ մեզ՝ ժողովրդավարության դեմ հարուցված խոչընդոտների փաստեր են ներկայացվում, իսկ նա ասաց, որ ինքն իր երկրի հայրենասերն է եւ ուզում է, որ Հայաստանն ընդգրկվի Եվրախորհրդում։ Այդ շրջանակում է միայն հնարավոր լուծել Լեռնային Ղարաբաղի հարցը»։
