Ինչպես հայտնի է, ամեն մի նոր թագավոր՝ գալով իշխանության, մշտապես դրդում է իր շքախմբին՝ մի երկու հայհոյական խոսք ասել իր նախորդի մասին՝ այսպիսով ժողովրդի համար ավելի ցայտուն դարձնելով իր սեփական իմաստուն ղեկավարությունը։ Նախորդ հանցավոր ռեժիմի դեմ պայքարելը հին ռուսական եւ խորհրդային ավանդույթ է. մասնավորապես, Խրուշչովի ժամանակ փնովում էին Ստալինին, Բրեժ-նեւի ժամանակ՝ Խրուշչովին, Գորբաչովի ժամանակ՝ Բրեժնեւին եւ այլն։ Անկախ Հայաստանի հողում այդ ավանդույթի շարունակման պայմաններում ԱԺ պատգամավորներն անցած շաբաթ որոշեցին միանալ Արշակ Սադոյանի 7 երգին՝ խավարի, ցրտի եւ թալանի մասին։ Արդյունքում՝ ժողովրդական զանգվածների զգացմունքներին հաճո սադոյանական մեներգը վեր է ածվել իշխանահաճո երգչախմբի։
Պարույր Հայրիկյանը
Հեղինակային երգի անզուգական վարպետը որոշեց ձայնակցել հոկտեմբերի 27-ի գործով կալանավորվածների փաստաբաններին, վստահություն հայտնելով, որ կասկածյալների թվում կան բացարձակապես անմեղ մարդիկ։ Մարդու իրավունքների գլխավոր պաշտպանի այս եզրակացությունը, կարծում եմ, կարող է հիմք ծառայել սահմանադրական եւս մի փոփոխության։ Բարեփոխված հիմնական օրենքում կարելի է մտցնել հետեւյալ կետը. «Պարույր Հայրիկյանը, խորհրդակցելով ՀՀ նախագահի հետ, որոշում է, թե ովքեր են ՀՀ քաղաքացիներից բացարձակապես մեղավոր, իսկ ով՝ բացարձակապես անմեղ, եւ դրա հիման վրա որոշում է ընդունվում՝ այդ քաղաքացիներին պատժել-չպատժելու հարցը»։
Կարդացեք նաև
ԱՐԱՄ ԱԲՐԱՀԱՄՅԱՆ
