ՄԱԶԾ-Ն ԱՋԱԿՑՈՒՄ Է Երեկ ՄԱԿ-ի զարգացման ծրագիրը (ՄԱԶԾ) արդարադատության նախարարության ու առեւտրի եւ տնտեսական զարգացման նախարարության հետ համատեղ կազմակերպել էր «Լոբբիստական գործունեության մասին» ՀՀ օրենքի հայեցակարգի նախագծի քննարկում: Նպատակն էր՝ դիտարկել հայեցակարգի նախագծի վերաբերյալ շահագրգիռ կազմակերպությունների, այդ թվում՝ գործարար հատվածի շահերը ներկայացնող միությունների մոտեցումներն ու առաջարկները: Քննարկմանը ներկայացվեցին լոբբիստական գործունեության կարգավորման միջազգային փորձը, լոբբիստական գործունեության ձեւերը, սահմանափակումները, լոբբիստի իրավունքներն ու պարտականությունները: ԱԺ ՄԱԿ խմբակցության փորձագետ Հովսեփ Ղազարյանը, թեմայի առնչությամբ հայտնելով իր կարծիքը, մասնավորապես ասաց. «Յուրաքանչյուր պատգամավոր իր ընտրողների լոբբիստն է, յուրաքանչյուր կուսակցություն իր գաղափարակիրների ու կողմնակիցների լոբբիստն է, հայկական մենթալիտետի համաձայն յուրաքանչյուր ոք արդեն լոբբիզմ է իրականացնում իր այն ծանոթ-բարեկամի միջոցով, որ պաշտոնական դիրք է գրավում: Բայց եթե խումբ ես, չունես ծանոթ, չունես հնարավորություններ, բայց ցանկություն ունես կյանքը լավացնելու, լսելի դառնալ՝ առանց ցույցերի, երթերի, ապա կարող ես լոբբիստ վարձել»: ՄԱԶԾ «Աջակցություն տեղեկատվական հասարակությանը եւ ժողովրդավարական կառավարմանը» ծրագրի մասնագետ Վահան Ասատրյանը հույս հայտնեց, որ հանրային իրազեկության բարձրացումը կնպաստի քաղաքացիների մասնակցությանը որոշումների ընդունմանն ու դրանց վերահսկողությանը: Ինչն էլ իր հերթին հիմք կծառայի կոռուպցիայի դեմ պայքարի արդյունավետության բարձրացմանը: Հ. Բ.
