Հերթը
հասավ Քանաքեռի անտառներին 33 տարվա պատմություն ունեցող Քանաքեռգէսի բանավանի
այգու ցանկապատված մոտ 1000 մետր քառակուսի այս հատվածն այլեւս անհասանելի է: Մեկ
տարի առաջ այստեղ կտրվեցին ծառերը: Այսօր արդեն շինարարություն է ընթանում: Կառուցվում
է Արաբկիրի ոստիկանապետ Գագիկ Ավետիսյանի առանձնատունը: Ապարանքը կառուցվում է անտառի
ետնամասում: Այսինքն՝ ոստիկանապետը իր դղյակը ելք ու մուտք անելու համար այգու կածանները
նույնպես պետք է բարեկարգի՝ իր մեքենայի լայնությունը հաշվի առնելով: Բանավանի
բնակիչները, իհարկե, փորձել են բողոքել: «Եկան ծառերը կտրեցին՝ մի-երկու անգամ խոսեցինք,
կռիվ արեցինք՝ հաջորդ օրը բռնեցին, տարան ծեծեցին: Հիմա էլ ո՞վ ռիսկ կանի դուրս գա
մի բան ասի: Ճիշտ խոսելու համար գաղութ են տանում, բռնապետություն է»,- երեկ «Առավոտի»
հետ զրույցում պատմում էին բանավանի բնակիչները: «Այգու էս ծայրից էն ծայրը չէր երեւում…
հիմա էլ ի՞նչ, արդեն ուշ է, պրծավ…»,- հուսահատությունից եւ անճարակությունից այսպես
են խոսում մարդիկ: 1950-ական թվականներից բանավանի բանվորների ջանքերով ստեղծված
այս այգին տարիներ շարունակ խաղատեղի է եղել հարեւանությամբ գտնվող մանկապարտեզի
երեխաների համար: Եվ ոչ միայն՝ «Ծառեր էին, մաքուր օդ, հով, մարդիկ հավաքվում նստում,
հանգստանում էին, ժամանակ էին անցկացնում: Հիմա մանկապարտեզի երեխեքին արգելել են
այստեղ բերել, մեծերն էլ ռիսկ չեն անում: Էսօր էստեղ են ծառերը կտրել շինարարություն
անում, ի՞նչ երաշխիք, որ վաղն էլ 50 մետր այն կողմ չեն կտրի: Բա տուն են սարքում,
վաղն էլ գարաժ կուզեն, տան առաջ բասեին ու չգիտես ինչ կուզեն»,- պատմում են իշխանություններից
հուսախաբ եղած ու «կյանքից՝ անզորությունից ու անճարակությունից հոգնած» մարդիկ:
Ի դեպ, ընթացող շինարարությանը կից մոտ 500 մետր քառակուսի տարածքում, որտեղ նույնպես
ծառերը կտրված են, խոտերն ու թփերն էին այրել: Հավանաբար հերթական շինարարությունն
են նախապատրաստում: ՆԵԼԼԻ ԳՐԻԳՈՐՅԱՆ