Օրերս Բժշկական համալսարանում տեղի ունեցած
բուհական խորհրդի նիստից հետո ապագա ռեկտորի թեկնածուների պայքարը սկսել է նոր
թափ ստանալ: Ինչպես արդեն նշել էինք, այդ պայքարը քաղաքական
երանգ է ստանում: Դրա ամենակարեւոր պատճառն այն է, որ այս բուհի արտաբյուջեն կազմում
է տարեկան նվազագույնը 1.5 միլիարդ դրամ: Եթե սրան ավելացնենք նաեւ բուհի վարչական
ռեսուրսները, ապա պարզ է, թե ինչու արժե այս պաշտոնի համար պայքարել: Այս
պահին ռեկտորի թեկնածուների հարցում մի փոքր փոխվել են շեշտադրումները: Հիմնական
թեկնածուներն էին բուհի ամբիոնի վարիչ Գոհար Քյալյանը եւ Շտապօգնության հիվանդանոցի
տնօրեն Արայիկ Մինասյանը: Մեր տվյալներով, վերջինս կարծես թե սկսել է նահանջել՝ թուլացնելով
իրեն սատարող ՀՀԿ-ի դիրքերը: Հիշեցնենք, որ բուհի խորհրդի կազմում Ա. Մինասյանը
վայելում է ուսանողական ու կառավարության ամբողջ մասնաբաժնի, ինչպես նաեւ դասախոսական
հատվածի գրեթե կեսի համակրանքը: Եթե Ա. Մինասյանը վերջին պահին հրաժարվի դնել իր
թեկնածությունը, ապա կստացվի, որ ՀՀԿ-ն թեկնածու չունի: Ըստ հնարավոր սցենարներից
մեկի, այդ դեպքում կմնա միայն Գոհար Քյալյանը եւ չի անցնի, նորից կհայտարարվի մրցույթ,
եւ ՀՀԿ-ն անշուշտ կգտնի մի ուրիշ հարմար թեկնածու: Մեկ այլ սցենարով, չի բացառվում,
որ 2-րդ թեկնածուն կլինի բոլորովին այլ քաղաքական ուժի թեկնածուն, որին, մեր տեղեկություններով,
ՀՀԿ-ն այս պահին պատրաստ է սատարել, միայն ոչ՝ Գ. Քյալյանին: Իսկ վերջինս, թեեւ ԿԳ
նախարարը երեկ մեզ հետ զրույցում դա հերքեց, սակայն ասում են՝ ՕԵԿ-ի թեկնածուն է:
Այդ է պատճառը, որ բուհի կոլեկտիվը կասկածանքով է նայում պրոռեկտոր, բուհի խորհրդի
անդամ Վլադիմիր Շեկոյանին ռեկտորի պաշտոնակատար նշանակելու փաստին: Ինչը դիտվում
է իբրեւ լրացուցիչ քարոզչություն իրականացնելու միջոց՝ վարչական լծակների գործադրմամբ:
«Պետական ոչ առեւտրային կազմակերպությունների մասին» ՀՀ օրենքի 18-րդ հոդվածի
2-րդ կետում ասվում է. «Պետական կազմակերպության կոլեգիալ կառավարման մարմնի անդամ
կարող են լինել միայն ֆիզիկական անձինք: Պետական կազմակերպության գործադիր մարմնում
նշանակված անձը չի կարող լինել կոլեգիալ կառավարման մարմնի անդամ: Նա իրավունք ունի
կոլեգիալ կառավարման մարմնի նիստերին մասնակցել խորհրդակցական ձայնի իրավունքով»:
Այսինքն՝ Վ. Շեկոյանը, լինելով խորհրդի անդամ, իրավունք չունի նաեւ թեկուզ ժամանակավոր,
պաշտոնավարելու: ԿԳ նախարարն այդ մասին մեզ ասաց, որ հարցը քննարկվել է իրավաբանների
հետ ու հաստատ որեւէ արգելք չկա. «Խոսքը ռեկտորի պաշտոնին է վերաբերում, նա ո՛չ ռեկտոր
է, ո՛չ էլ թեկնածու: Դա օրենքին չի հակասում»: Ի դեպ, կա եւս մեկ սցենար՝
Գոհար Քյալյանը դառնում է միակ թեկնածուն եւ հաղթում՝ նաեւ ՀՀԿ-ի հետ համաձայնությունների
արդյունքում: ՀԱՍՄԻԿ ԲՈՒԴԱՂՅԱՆ
