Գիշերային
հերթափոխի պրակտիկանտները հրաժարվել են մեկ րոպե անգամ քնել Ի՞նչ է տալիս
բժշկական պրակտիկան եւ պատրա՞ստ են, արդյոք, ապագա բժիշկները աշխատել գիշերային հերթափոխում:
Բժշկական համալսարանի ուսանող Մերուժանը առանց վարանելու պատասխանեց. «Բժշկական պրակտիկան
մեզ առաջին հերթին տալիս է գիտելիքների մեծ փորձ, գիտելիքների կիրառում եւ, ինչպես
ասում են, մինչեւ աչքովդ չտեսնես կամ՝ ավելի լավ է մի անգամ տեսնես, քան 100 անգամ
լսես: Իսկ գիշերային թե ցերեկային հերթափոխ, ինձ թվում է՝ պետք չէ տարբերակել, քանի
որ հիվանդանոցում աշխատանքը իր հունով ընթանում է գիշեր ու ցերեկ: Եվ մենք վստահ
ենք եղել մեր ուժերին, ընտրել ենք այս մասնագիտությունը եւ պատրաստ ենք «անձնազոհ»
աշխատել, քանի որ գործ ունենք մարդկանց հետ»: Մերուժանը հասցրել է երկու անգամ
բժշկական պրակտիկան անցկացնել Էրեբունի ԲԿ-ում, առաջին անգամ եղել է ընդունարանում,
ծանոթացել հիվանդանոցի ընդհանուր անցուդարձին, «շարժին», իսկ երկրորդ անգամ՝ պլաստիկ
անոթային միկրովիրաբուժության բաժանմունքում: Նա մի քանի անգամ գիշերել է հիվանդանոցում
եւ ականատես եղել բազմաթիվ հիվանդությունների կանխմանն ու բուժման ընթացքին: Ըստ
Մերուժանի, գիշերային ժամերին շատ հաճախ գալիս են կույր աղիի կամ ներքին օրգանների
սուր նոպայով հիվանդներ, լինում են թունավորման, երբեմն էլ դանակահարության եւ հրազենային
վնասվածքների դեպքեր: Հիշեց նաեւ մի դեպք. «Կեսգիշերին եկավ մոտ 25 տարեկան մի երիտասարդ,
որը բողոքում էր ձախ կողմի սուր ցավերից: Նրան ուղարկեցին հետազոտությունների՝ սոնոգրաֆիա
եւ այլն, վերջում պարզվեց՝ ոչ մի էական շեղում չկար, ուղղակի ալկոհոլի չարաշահման
ազդեցությունն էր իրեն զգացնել տվել»: Հատկապես վերակենդանացման բաժանմունքում,
որտեղ հիվանդները գտնվում են անգիտակից վիճակում, պահանջվում է մեծ ուշադրություն
եւ կազմակերպվածություն: «Կարծես ռազմական դրություն լինի, քույրերը ամեն րոպե հսկում
են եւ գիշերային ժամերին արգելվում եւ բացառվում է քնելը: Գիշերային հսկողությունը
դինամիկ զննման մեջ է, քանի որ հիվանդները գտնվում են սարքավորումների ցուցանիշների
ներքո, ակնթարթորեն փոխվող ցուցանիշի դեպքում բուժքույրերը պետք է պատրաստ լինեն
ամեն ինչի, քանի որ դա է բժշկի պարտականությունը»,- հավաստեց Մերուժանը: Վիրաբուժության
բաժանմունքում հերթափոխով աշխատում են 1 վիրաբույժ՝ իր օգնականով եւ մի քանի բուժքույր:
(Նրանք ունեն իրենց համար նախատեսված հանգստի սենյակը՝ լավ կահավորված): Վիրահատությունները
հիմնականում կատարվում են ցերեկային ժամերին, իսկ երկուշաբթի օրերը պլանային վիրահատություն
չի կատարվում, բայց ամեն դեպքում նախատեսված պատրաստ սենյակ լինում է՝ անհետաձգելի
պահերին վիրահատելու նպատակով: Մերուժանը պատմեց, որ հիմնականում շատացել են քթի
վիրահատությունները, նա շատ անգամ ներկա է գտնվել այդ վիրահատություններին, «յուրաքանչյուր
վիրահատություն ռիսկ է, հեշտ վիրահատություն գոյություն չունի»: Նա իր ձեռքով կատարել
է կարերի քանդում, բայց ոչ սրսկում: Ըստ նրա, «կար քանդելը ոնց որ շոր քանդել լինի,
ուղղակի պետք է յուրաքանչյուր ակնթարթ պահպանես ասեպտիկայի կանոնները»: Ինչպես նշեց
Մերուժանը, իրենց համար բոլոր պայմանները ստեղծված էին գիշերը հանգիստ քնելու համար,
սակայն իրենք հրաժարվել են, քանի որ այդ ընթացքում կարող էին նոր բաներ տեսնել, սովորել
եւ հետագայում կիրառել: ԱՐԵՎ ԲԱՐՍԵՂՅԱՆ
