Սփյուռքահայ կոմպոզիտորը հիշեցնում է Լրանում է հայ անվանի կոմպոզիտոր Գրիգոր Հախինյանի ծննդյան 80-ամյակը «Առավոտը» այս առիթով ստացել է օրաթերթի մշտական ընթերցող, կոմպոզիտորի առաջին ուսանողներից մեկի՝ ներկայումս Իսրայելի Հայֆա քաղաքում բնակվող կոմպոզիտոր Նուբար Ասլանյանի «որդիական մտահոգությունը»: Հետեւելով հայրենիքում կատարվող մշակութային անցուդարձին, հավանաբար իմանալով, որ Հայաստանում այս կամ այն անվանի արվեստագետի հոբելյանը երբեմն նշվում է ուշացումով կամ նույնիսկ անտեսվում, Ն. Ասլանյանը իր պարտքը համարեց նախօրոք ահազանգել մեզ, հիշեցնելով, որ ապրիլի 20-ին Գ. Հախինյանի հոբելյանն է, նշանավոր կոմպոզիտորը կդառնար 80 տարեկան: Էլեկտրոնային ծավալուն նամակում Ն. Ասլանյանը շարադրել է հիշողություններ Հախինյանի մասին՝ սկսած Ռ. Մելիքյանի անվան երաժշտական ուսումնարանում նրա հետ առաջին իսկ հանդիպումից մինչեւ Երեւանի պետկոնսերվատորիա ընդունվելը, որտեղ սովորել է իր ուսուցչի պրոֆեսորի՝ Գրիգոր Եղիզարյանի դասարանում: Ն. Ասլանյանի հավաստմամբ, Գ. Հախինյանը անգամ ուսանողական տարիներից հետո էլ «պատասխանատվությամբ էր վերաբերվում իր մանկավարժական գործունեությանը: Ներկա էր լինում իր ուսանող կոմպոզիտորների բոլոր նախահամերգյան փորձերին, տեղում խորհուրդներ տալիս: Ավելին, շնորհիվ նրա հեղինակության, մարդամոտ, ժողովրդական խառնվածքին, իր ուսանողների գործերը կատարում էին այն տարիներին արդեն ճանաչված երաժիշտներ Վիլեն Չարչօղլյանը, Լեւոն Ալոյանը, Ռուբեն Ալթունյանը, Ֆլորա Խորենյանը, Ռուբեն Ահարոնյանը, Վահե Ահարոնյանը եւ այլք»: Ն. Ասլանյանը վստահ է, որ մասնագետները համակարծիք կլինեն իր հետ. «Հախինյանը այսօր էլ մեզ ներկայանում է որպես խիստ ազգային կոմպոզիտոր: Լավ գիտենալով հայկական ժողովրդական ու գուսանական երաժշտությունը, նա բարձր է գնահատել ժողովրդի արվեստը, խորապես սիրելով ու ուսումնասիրելով նյութը: Նա եկել է մի հանրահայտ ճշմարտության, որ կոմպոզիտորական արվեստում ճշմարիտ ներշնչման աղբյուր կարող է հանդիսանալ ժողովրդական երաժշտությունն իր բոլոր դրսեւորումներով: Վերջին միտքս վառ երեւում է կոմպոզիտորի երաժշտական, թատերական, կինոֆիլմերի համար գրած երաժշտությունում, կանտատներում ու օրատորիաներում, կամերային, գործիքային ստեղծագործություններում, երգերում ու ռոմանսներում: Ժամանակին Երեւանի օպերային թատրոնի խաղացանկը զարդարում էին Հախինյանի «Լոռեցի Սաքոն», «Ախթամար» բալետները»: Գրիգոր Հախինյանի հոբելյանական տարեթվի առիթով պարզեցինք, որ ապրիլի 13-ին Կամերային երաժշտության տանը մշակույթի նախարարության եւ Կոմպոզիտորների ու երաժշտագետների միության համատեղ ջանքերով կայացել է զուտ հախինյանական ստեղծագործություններից կազմված երեկո, որի համար նախարարությունը հատկացրել է $1000: Նուբար Ասլանյանը երեկ զանգահարեց «Առավոտ» եւ մեկ այլ հոբելյանի առիթով տեղեկացրեց, որ Էդվարդ Միրզոյանի ծննդյան 85-ամյակին նվիրված Հայֆայի «Կիներետ» լարային քառյակը կատարել է իր ստեղծագործությունը, իսկ իր խնդրանքին՝ Հայաստանի պետական սիմֆոնիկ նվագախմբի (ՀՊՖՆ) կատարմամբ եղեռնի տարելիցի առիթով հնչեցնել «Սիփանա քաջեր» կոնցերտ-պոեմը, դեռ չեն պատասխանել: «Ի դեպ, «Սիփանա քաջերի» պարտիտուրը գտնվում է Վիեննայի ազգային գրադարանում, որտեղ պահվում է Ֆրանց Վերֆելի «Մուսա լեռան 40 օրը» վեպի ձեռագիրը»,- ասաց կոմպոզիտոր Նուբար Ասլանյանը: Այս կապակցությամբ ՀՊՖՆ-ի տնօրեն Ռուզաննա Սիրունյանը հայտնեց, որ իրենց համերգային ծրագրերը կազմվում ու հաստատվում են յուրաքանչյուր համերգաշրջանից մոտ 1 տարի առաջ: «Այդ հարցով մշակույթի նախարարություն է դիմել ՀՀ արտաքին գործերի նախարարությունը՝ իսրայելահայ կոմպոզիտոր Նուբար Ասլանյանի հիշյալ գործը կատարելու խնդրանքով: Այն մենք կարող ենք Ֆիլհարմոնիկի ծրագրում ընդգրկել միայն 2007-ին»,- տեղեկացրեց Ռ. Սիրունյանը: Ս. ԴԱՆԻԵԼՅԱՆ