![\"\"](\"https://www.aravot.am/2007/aravot_arm/November/17/p1.jpg\")
Երեկ Հյուսիսային պողոտայի բացման արարողության ժամանակ Ռոբերտ Քոչարյանը եւ նրան ուղեկցող չինովնիկները պողոտայով շրջելիս, հասնելով Թումանյան փողոց՝ շրջանցեցին բողոքի ցույցը, որը կազմակերպել էին այդ պողոտայի՝ իրենց տներից վտարված բնակիչները: Նրանց հայրենի ոստիկանները՝ կարմիր բերետավորների հետ միասին, արդեն աքցանի մեջ էին առել: Բայց ցուցարար մի տիկին՝ Ալվարդ Ավագյանը, փորձեց անվտանգության աշխատակիցների շղթան ճեղքել եւ մոտենալ Քոչարյանին: Տիկինն այնքան էր վրդովված, որ բարձրաձայն մի քանի «քաղցր» խոսք ուղղեց նրան ու նրա ուղեկցողներին: Դա լսելով՝ Ռոբերտ Քոչարյանը տեղում հրահանգեց. «Մի հատ դրան լռեցրեք ու տարեք էդտեղից»: Ոստիկանները գործի անցան՝ փորձելով «կարգի հրավիրել» բողոքավոր կնոջը: Այդ գործը ստանձնեց ՀՀ ոստիկանության ՊՊԾ վարչության պետ, ոստիկանության գնդապետ, «Բազազ» մականվամբ Ռոբերտ Մելքոնյանը, որը հանրությանը հայտնի է որպես հոկտեմբերի 23-ի խաղաղ երթի մասնակիցների նկատմամբ կատարված բռնությունների ղեկավար: Բարեբախտաբար, այս անգամ «անզգույշ քաշքշուկ» չեղավ, ինչպես եղել էր «Պապլավոկում»՝ Պողոս Պողոսյանի հետ:
