Երեկ լրագրողների հետ հանդիպման ժամանակ Լեռնային Ղարաբաղի Հանրապետության պաշտպանության նախարար Մովսես Հակոբյանը հայտարարել է, թե ղարաբաղա-ադրբեջանական պատերազմում 15 տարի առաջ կնքված հրադադարի առաջին օրվանից Ադրբեջանը միշտ էլ փորձել է շփման գծում բարելավել իր դիրքերը՝ ԼՂՀ զինված ուժերը լարված վիճակում պահելու համար: Ըստ ԼՂՀ պաշտպանության նախարարի, դա մասամբ հաջողվել է, շատ հաճախ էլ ԼՂՀ պաշտպանության բանակի ուժերով՝ կանխվել:
Առաջին գծում դիրքերը բարելավելու քայլեր է կատարել նաեւ հայկական կողմը: Մովսես Հակոբյանի տվյալներով, 2008թ. ԼՀՂ-ն բարելավել է շփման գծի ձախ թեւը, այս տարի՝ աջ թեւը՝ Արաքսի ափը: Եվ արդյունքում՝ մեր դիրքերը մոտ 4 կմ առաջ են քաշվել:
Հրադադարի խախտման դեպքերի հարթությունում առաջատարը Ադրբեջանն է: Ըստ Ղարաբաղի պաշտպանության նախարարի հրապարակած տվյալների, 2006 թվականին մեր ուղղությամբ եղել է կրակոցների 589 դեպք, պատասխան՝ 116 անգամ: 2007թ. մեզ վրա կրակել են 1445 անգամ՝ մենք՝ 431: 2008 թվականին՝ մեր ուղղությամբ 3480 եւ 728՝ մենք: 2009 թվականին մեր ուղղությամբ արդեն 1098 կրակոց է եղել, Ղարաբաղը պատասխանել է 186-ին:
