Երեկ պարզ դարձավ, թե նախորդ օրը ԿԳՆ-ից ով եւ ինչու է զանգել «Առավոտի» խմբագրություն եւ խնդրել շտապ լրագրող ուղարկել նախարարություն: ԿԳՆ հասարակայնության հետ կապերի եւ տեղեկատվության վարչության պետ Արթուր Բաղդասարյանը «Առավոտին» փոխանցեց հետեւյալը. «Երեկ երեկոյան պարզեցինք, որ զանգը իսկապես եղել է ԿԳՆ մարզառազմական եւ արտաուսումնական դաստիարակության վարչությունից: Վարչության պետը աշխատակիցներից մեկին՝ մարզառազմական դաստիարակության բաժնի առաջատար մասնագետ Ալվարդ Էվոյանին կարգապահական նկատողության առաջարկ է ներկայացրել: Ի դեպ, այդ անձը նախկինում արդեն մեկ նկատողություն ստացել է: Հավանաբար երկրորդ նկատողության առաջարկը նրան վրդովեցրել է, եւ նա իր վրդովմունքը փորձել է այդպես արտահայտել: Հետո նաեւ պարզ դարձավ, որ այդ բաժնում երկու կին են աշխատում, որոնցից մեկը հիվանդության պատճառով չի եկել աշխատանքի, բացառվեց նաեւ քաղաքացիների զանգի տարբերակը ու պարզ դարձավ, որ զանգողը հենց իմ նշած անձնավորությունն է»: Ա. Բաղդասարյանից հետաքրքրվեցինք՝ գուցե կնոջը տեղում ճնշեցին, դրա՞ համար նա չներկայացավ: Նա պատասխանեց. «Քաղծառայության մասին օրենքով նա իր բողոք- դժգոհությունը պիտի ներկայացներ իր անմիջական ղեկավարին, այնինչ, նա փորձել էր դա անել անանուն զանգի միջոցով, մինչդեռ եթե երեկ նա ներկայացներ՝ կփորձեինք խնդիրը լուծել»: