Երեկ մինչ ՀՀ Ազգային ժողովը կքննարկեր համաներում հայտարարելու մասին ՀՀ նախագահի առաջարկության տեքստը, «ինքնաբուխ հնարահավաք» էին կազմակերպել մայրաքաղաքի բնակիչները: Նրանք ԱԺ ուշադրությունն էին հրավիրում համաներման մի քանի սկզբունքների վրա: Հանրահավաքի մասնակիցներից ՀԱԿ անդամ Վարդգես Գասպարիի կարծիքով, իրենց ընկերների (նկատի ունի մարտի 1-ի դեպքերի հետ կապված անազատության մեջ հայտնվածներին) նկատմամբ պետք է արդարացման որոշում լինի, այլ ոչ թե՝ համաներման: Հանրահավաքի մասնակիցներից Գայանե Կիրակոսյանի ամուսինը 2-րդ խմբի հաշմանդամ է եւ դատապարտվել է 5 տարվա ազատազրկման: Նրան հետաքրքրում էր, թե ԱԺ-ն կընդգրկի՞ իր ամուսնուն համաներման ցուցակում: Հանրահավաքի մասնակիցներից մեկն էլ Գյումրիից եկած Վահան Խաչատրյանն էր, որի եղբայրը արցախյան հերոսամարտի մասնակիցներից է: Ի դեպ, համաներման համար առաջարկվել էր ընդգրկել եւ այս խմբին, մարդկանց, որոնք մասնակցել են մարտական գործողությունների, ունեն բռնադատվածի կարգավիճակ եւ նախկինում դիտավորյալ հանցագործություն կատարելու համար ազատությունից զրկելու հետ կապված պատիժ չեն կրել կամ կրել են, uակայն չունեն դատվածություն: ԱԺ-ն պահպանող ոստիկանները մի քանի անգամ դիմեցին «ինքնաբուխ» հանրահավաքի մասնակիցներին՝ դադարեցնել հանրահավաքը: