Շիրակի մարզպետ Լիդա Նանյանը այցելել է օրեր առաջ ուժգին քամու եւ կարկտահարության հետեւանքով տուժած համայնքներ եւ վերջում Ամասիայի տարածաշրջանի գյուղապետերի հետ քննարկել համայնքների հողի հարկի պարտքերի հավաքագրման եւ այդ ուղղությամբ տարվելիք աշխատանքների վիճակը: Ըստ մարզպետարանի՝ տիկին Նանյանը խիստ քննադատել է այն համայնքների ղեկավարներին, ովքեր մինչ օրս չեն ծանուցել իրենց համայնքների բնակիչներին կառավարության կարեւոր որոշումների մասին: Ոմանց էլ մարզպետը քննադատել է «սեփական համայնքների նկատմամբ անսրտացավ մոտեցման համար՝ մասնավորապես ներհամայնքային ճանապարհների անմխիթար վիճակի պատճառով: Կարելի է եթե ոչ ամբողջությամբ, ապա գոնե հարթեցման աշխատանքների միջոցով որոշ չափով անցանելի դարձնել ճանապարհները»:
Իսկ երբ մարզպետը խոսել է Ամասիայի եւ Աշոցքի տարածաշրջանների համայնքներում ոչխարաբուծության զարգացման մասին եւ նկատել, որ այս շրջանները դեռեւս խորհրդային տարիներից մշտապես աչքի են ընկել անասնաբուծության լավ ցուցանիշներով, «համայնքների ղեկավարները բավականին խանդավառությամբ ընդունեցին մարզպետի առաջարկը ոչխարաբուծության զարգացման վերաբերյալ եւ խոստացան կարճ ժամկետներում բնակչության հետ բացատրական աշխատանքներ տանելուց հետո սկսել պայմանագրերի կնքման գործընթացը»:
