Հայաստանի Հելսինկյան կոմիտեի նախագահ Ավետիք Իշխանյանը երեկ «Ուրբաթ» ակումբում հրավիրել էր մամուլի ասուլիս: Օրակարգում սուտ մատնության համար 3,5 տարվա ազատազրկման դատապարտված Սարգիս Հացպանյանի եւ նրա նկատմամբ համաներում կիրառելու հարցն էր: Ս.Հացպանյանը մասնակցել է արցախյան հերոսամարտին ու այդ մասին հայտարարեցին երեկ ասուլիսին ներկա նրա մարտական ընկերները, նաեւ ԼՂՀ ԱԺ փոխնախագահ Ռուբիկ Հյուսնունցը: Ա. Իշխանյանը տեղեկացրեց, որ ինչպես շատ ազատամարտիկների դեպքում է, այնպես էլ Հացպանյանի համար ՀՀ եւ ԼՂՀ պաշտպանության նախարարությունները տեղեկանք չեն տրամադրում: Այդ կառույցները պատճառաբանում են, որ նրա արխիվային փաստաթղթերը չեն պահպանվել: Երեկ տեղեկացվեց, որ պահպանվել է Ս.Հացպանյանի զինվորական վկայականը, որի համաձայն՝ նա եղել ԼՂՀ պաշտպանության բանակի սպա եւ ունեցել ամրագրված զենք: Հիշեցնենք, որ համաներումը տարածվում է ոչ միայն մինչեւ 5 տարվա ազատազրկման դատապարտվածների, այլեւ նախեւառաջ ազատամարտիկների ու պատերազմի մասնակիցների վրա: Դա նշանակում է, որ համաներման ակտի ընդունման պահից Հացպանյանն ազատ պիտի լիներ:
