Հուլիսի 24-ին «Առավոտը» տեղեկացրել էր, որ 2008 թվականին Տավուշի մարզում սկսվել եւ կիսատ է մնացել նախկին կոլխոզային եւ սովխոզային անտառները համայնքներին հանձնելու ծրագիրը, արդյունքում մի շարք անտառների ճակատագիրը մշուշվել էր:
Ինչպես տեղեկացանք ՀՀ տարածքային կառավարման նախարարությունից, նույն օրը հարցը նախարարությունում քննարկվել է բնապահպանության, գյուղատնտեսության նախարարությունների, Տավուշի մարզպետի եւ հ/կ-ների ներկայացուցիչների մասնակցությամբ եւ արձանագրվել, որ «ՀՀ գյուղատնտեսության եւ ՀՀ բնապահպանության նախարարությունների ոչ արդյունավետ համագործակցության հետեւանքով առաջացել են որոշակի խնդիրներ»:
Թե ինչ խնդիրներ, առայժմ չի մանրամասնվում: Բայց հայտնի է, որ համայնքներում ստեղծվող նոր անտառների սպասարկման հարցը, օրինակ, դեռ կարգավորված չէ:
ՀՀ տարածքային կառավարման նախարարությունը պատրաստ է առաջիկայում կազմակերպել եւս մեկ քննարկում եւ հրավիրել բոլոր շահագրգիռ կազմակերպություններին:
