Երեւանի ավագանու ընտրությունների ժամանակ հանրապետական կուսակցության կարգախոսներից էր «Կանաչ Երեւանը», բայց քաղաքապետի պաշտոնը եւ քաղաքի ավագանու տեղերի մեծամասնությունը գրաված հանրապետականը գործելաոճ է ընտրել առանց այն էլ նվազ կանաչն էլ ավելի նվազեցնելը: Լուսանկարում պատկերված սրճարանի «կմախքը» Երեւանի Արաբկիր վարչական շրջանի նստավայրից հազիվ 15-20 մետր է հեռու: Ինչպես մենք, այնպես էլ նրանք՝ չեն կարող չտեսնել, որ կառուցվող սրճարանի հատակի բետոնը «թափվել» է ծառերի բներին շատ մոտ, իսկ հենց ներսում հաստաբուն ծառեր կան եւ «օբյեկտը» վերջնական տեսքի բերելիս դրանք հաստատ հատվելու են:
Տարիներ առաջ այս նույն փոքրիկ այգու վերեւի հատվածում մի բարձրաստիճան ոստիկան իր «օբյեկտը դրեց» ու հատվեցին մի քանի հաստաբուն ծառեր: Հիմա հերթը այգու ներքեւի հատվածինն է: Ու ոչ ոք չի ասում, թե ուր մնաց «Կանաչ Երեւան» կարգախոսը: