Մալդիվյան կղզիներում երեկ տեղի են ունեցել «Թալիբան» շարժման ներկայացուցիչների եւ Աֆղանստանի իշխանությունների միջեւ ոչ պաշտոնական բանակցություններ: Այդ տեղեկությունները, ըստ «Ֆրանս պրեսի», հաստատել են նաեւ մալդիվյան իշխանությունները՝ միաժամանակ հավելելով, թե որեւէ կապ չունեն տեղի ունեցող բանակցությունների հետ: «Աֆղանստանում կայունությունը կապված է մեր տարածաշրջանի անվտանգության եւ կայունության հետ: Մալդիվյան կղզիների կառավարությունը պաշտպանում է Աֆղանստանում հակամարտության լուծման որոնումների ուղղությամբ գործադրվող ջանքերը»,- հայտարարել է երկրի նախագահի մամուլի քարտուղար Մուհամմեդ Զուհեյրը՝ հավելելով, թե մալդիվական անվտանգության ծառայություններն ու հետախուզությունը տիրապետում են բանակցությունների մասին տեղեկություններին՝ ողջ ծավալով: «Ալ-Ջազիրայի» մատուցմամբ, թեեւ Աֆղանստանի նախագահ Համիդ Քարզայը ոգեւորված չէ նման բանակցությունների անցկացմամբ, բայց դրանց մասնակցելու նպատակով Մալդիվներ է ուղարկել իր ոչ պաշտոնական ներկայացուցիչներին՝ բանավեճերի բովանդակությանը տեղյակ լինելու նպատակով: Շեշտվում է նաեւ, որ այդ հանդիպմանը՝ Արեւմուտքի ներկայացուցիչներ կանխամտածված չեն հրավիրվել:
Հիշեցնենք, որ աֆղանական իշխանությունների եւ թալիբների ներկայացուցիչների միջեւ միայն վերջին տարվա ընթացքում սա արդեն երկրորդ հանդիպումն է: Նախորդ համանման բանակցությունները տեղի էին ունեցել հունվարին, դարձյալ Մալդիվյան կղզիների տարածքում:
