Արդեն երրորդ տարին է, ինչ ՀԲԸՄ Բուենոս Այրեսի մասնաճյուղի տիկնանց հանձնախումբը կազմակերպում է «Դեպի մեր ակունքները» խորագրով ուխտ- այցելություն՝ մայր հայրենիք: Այս տարի նրանց այցելությունը նշանավորվեց Հայաստանի Հանրապետության անկախության 20-ամյակին նվիրված միջոցառումներով, վեհափառ հայրապետի ընդունելությամբ ու օրհնությամբ, եւ «Զվարթնոց» օդանավակայանի նոր տերմինալի բացման արարողությանը ներկա գտնվելով: Մեկ ամիս առաջ տիկնանց հանձնախումբը տիկին Դիանա Սարաֆյանի ղեկավարությամբ կազմակերպել էր մեծ ճաշկերույթ, որի հասույթը տրամադրվելու էր Երեւանում գործող Հակոբ Աղա Սաղաթելյանի անվան մանկական կենտրոնին, որտեղ իրենց ամենօրյա ուսուցումն են ստանում աուտիզմով հիվանդ հայ երեխաներ: Հավաքված 12 000 դոլարը պատվիրակները հանձնեցին կենտրոնի տնօրինությանը:
