Միավորված ազգերի կազմակերպության կրթության, գիտության եւ մշակույթի կազմակերպության՝ ՅՈՒՆԵՍԿՕ-ի (UNESCO) «Համաշխարհային ժառանգության քաղաքներ» 11-րդ համաժողովին, որը կայացել է Պորտուգալիայի Սինտրա քաղաքում, մասնակցում էր նաեւ հայոց հոգեւոր մայրաքաղաքի պատվիրակությունը` Էջմիածնի քաղաքապետ Կարեն Գրիգորյանի գլխավորությամբ:
Հեղինակավոր այս ընկերությանը, որը կազմավորվել է 1993 թվականին, անդամակցում են աշխարհի ավելի քան 200 քաղաքներ: Էջմիածինը, չնայած անդամակցության 5-ամյա փորձ ունի, բայց համաժողովին մասնակցում էր առաջին անգամ: Քննարկման հիմնական թեման համաշխարհային ժառանգության քաղաքներն ու կլիմայի փոփոխությունն էր:
Համաժողովի աշխատանքներին զուգահեռ, Էջմիածնի քաղաքապետը հանդես է եկել կազմակերպության եւ դրան անդամակցող քաղաքների հետ համագործակցության խորացմանն ուղղված առաջարկություններով: ՅՈՒՆԵՍԿՕ-ի անդամ քաղաքների ղեկավարներին առաջարկել է փոխգործակցել մասնավորապես համայնքային տնտեսության կառավարման ոլորտում:
Իսկ հավաքի կազմակերպիչները ասել են, որ Էջմիածնի մասնակցության փաստն արդեն իսկ նպաստավոր է ոչ միայն հոգեւոր կենտրոնի եւ դրա բնակիչների, այլեւ`Հայաստանի միջազգային հեղինակության ամրապնդման տեսանկյունից:
Կարդացեք նաև
Մարիամ ԱՐՍԵՆՅԱՆ
