Սյունիքի մարզկենտրոն Կապանում իրականացվող «Արժանապատիվ ծերություն» համայնքային ծրագրով մարզկենտրոնի խիստ կարիքավոր ընտանիքներին ու միայնակ տարեցներին կցուցաբերվի օգնություն:
Այժմ մեկնարկել է ծրագրի «Տաք ձմեռ» բաղադրիչը, որի մեջ ընդգրկված մոտ 100 խիստ անապահով կապանցի ընտանիքների ձմեռվա ջեռուցման ծախսերը, Կապանի քաղաքապետից բացի, կհոգան նաեւ քաղաքապետարանի այս նախաձեռնությանը միացած կապանցի մի շարք գործարարներ եւ «Դինո գոլդ մայնինգ քամփնի» ՓԲԸ-ն: Այս փուլում ընդգրկված շահառու ընտանիքների ձմեռային ջեռուցման ծախսի` օգտագործած էլեկտրաէներգիայի, գազի, վառելափայտի փոխատուցման նպատակով 30-45 հազարական դրամի չափով գումար կհատկացվի յուրաքանչյուրին: Քաղաքապետ Արտուր Աթայանը արդեն այցելել է ընտրված շահառու ընտանիքներից մի քանիսին` համոզվելու համար, թե արդյոք նպատակային են ընտրվել այդ ընտանիքները: Ծրագրում են արցախյան գոյամարտի տարիներին զոհված Երեմ Հարությունյանի ծնողները՝ Ստեփան եւ Ռիտա Հարությունյանները, ովքեր միակ որդու զոհվելուց հետո մնացել են մենակ: «Տաք ձմեռ» ծրագրով օգնություն կստանան մի նաեւ մի շարք փախստականներ:
«Նախապես որոշված էր «Արժանապատիվ ծերություն» ծրագրում ընդգրկել միայնակ, անժառանգ, անկողնային հիվանդ տարեցների մոտ 30 ընտանիք, բայց քանի որ ձեռնարկին արձագանքեցին նաեւ գործարարներ, ներառեցինք նաեւ զոհված ազատամարտիկների վաթարագույն վիճակում ապրող միայնակ ծնողների, խիստ անապահով եւ հատուկ կարիքավոր երեխաներ ունեցող ընտանքիների: Մարդիկ շարունակում են դիմել քաղաքապետարան, երբ իմանում են ծրագր մասին: Չի բացառվում, որ կան դեռ էլի ընտանիքներ, որոնց տեղը մենք դեռ չգիտենք, բայց պատրաստ ենք ընդգրկել ծրագրում: Քաղաքապետի նախաձեռնությամբ առաջին անգամ է նման ծրագիր իրականացվում Կապանում», -«Առավոտի» հետ զրույցում նշում է Կապանի քաղաքապետարանի մամուլի խոսնակ Հասմիկ Թովմասյանը:
«Արժանապատիվ ծերություն» ծրագրի «Տաք ձմեռ» բաղադրիչին գարնանը հաջորդելու է «Բարեկարգում» փուլը, որի շրջանակներում շահառու ընտանիքների տնային պայմանների բարեկարգման, տանիքների նորգման, մաքրման աշխատանքներ կիրականացվեն՝ էլի քաղաքապետարանի ֆինանսական աջակցությամբ: «Արժանապատիվ ծերություն» ծրագրի երրորդ փուլն արդեն առողջապահական ուղղվածություն կունենա` շահառուների առողջապահական խնդիրների լուծում՝ դեղորայքի, ակնոցների եւ այլ պարագաների ապահովում, վիրահատությունների կազմակերպում եւ այլն:
Կարդացեք նաև
Թե ողջ Հայաստանում, թե Կապանում նման բարեգործական ակցիաներ իրականացվում են հիմնականում ընտրություններից ընտրություն, որ շատերը կրկին տպավորություն ունեն, որ սա արվում է եկող տարվա աշնանը նախատեսված Կապանի քաղաքապետի ընտրություններին ընդառաջ: Քաղաքապետի մամլո խոսնակ Հասմիկ Թովմասյանը հավաստիացրեց, որ Արտուր Աթայանի սկսած ձեռնարկը կապ չունի որեւէ ընտրության հետ:
Մերի ՍՈՂՈՄՈՆՅԱՆ
