Փետրվարի լույս 2-ի գիշերը Նոյեմբերյան-Իջեւան ճանապարհին, Նոյեմբերյան քաղաքից 10 կմ հեռավորությամբ գտնվող Ջուջեւան գյուղի ծայրամասում վրացական համարանիշներով երկու բեռնատար փակել էին միջպետական ճանապարհը:
Իջեւանի կողմից շարժվող բեռնատարի վարորդը տեսնելով, որ ճանապարհը պատված է մերկասառույցով ,կանգ էր առել: Նոյեմբերյանի կողմից Երեւան մեկնող «ֆուռի» վարորդն էլ տեսնելով, որ այդ բեռնատարը կանգնած է՝ վախից արգելակել էր եւ մեքենան սահելով` ողջ երկայնքով փակել էր ճանապարհը:
Ինչպես վկայեց վրացական բեռնատարներից մեկի վարորդը, գիշերվա ժամը 3-ից ճանապարհը փակ էր: Սակայն մեծ անցողունակություն ունեցող մեքենաներն այդ փակված հատվածը շրջանցել են ճանապարհին կից այգու միջով:
Կարդացեք նաև
Գիշերվա 4-ից տարածքում է գտնվել Ջուջեւանի գյուղապետ Ժորա Չիլինգարյանը: Նա նաեւ գիշերային ապաստան է առաջարկել Թուրքիայից ժամանած, ճանապարհին մնացած «Ֆորդի» մեջ գտնվող երեւանցի 4 կանանց, սակայն վերջիններս հրաժարվել են:
Փետրվարի 2-ին, ժամը 9-ի սահմաններում ճանապարհի սպասարկումն իրականացնող Նոյեմբերյանի «Լեւոն երկրորդ» ընկերության գրեյդերը քաշեց 2 բեռնատարները, ճանապարհը բացվեց: Այդ տարածքում էր գտնվում Նոյեմբերյանի փրկարար ծառայության ղեկավար Էդիկ Խաչիկյանը:
«Լեւոն երկրորդ» ՍՊԸ աշխատակիցները փետրվարի 1-ի գիշերվա ժամը 11-ի սահմաններում եւ փետրվարի 2-ի առավոտյան ավազ եւ աղ են սփռել ճանապարհին: Ներկայումս ճանապարհը երթեւեկության համար բաց է:
Զարմանալի է, որ ՀՀ արտակարգ իրավիճակների նախարարության կայքը միջպետական ճանապարհի այդ հատվածի առժամանակ փակ լինելու մասին չի զետեղել տեղեկատվություն:
Ոսկան ՍԱՐԳՍՅԱՆ
