«Ես չեմ կարծում, որ սա նաեւ ԲՀԿ-ի տեսակետն է, այն պատճառով, որ անցած տարիների ընթացքում ԲՀԿ-ն երբեւէ չի դրսեւորել այդպիսի դիրքորոշում: Եթե այդպիսի դիրքորոշում լիներ, կուսակցությունը, բնականաբար, չէր մնա կոալիցիայի մեջ: Մենք շատ լավ համագործակցել ենք եւ կիսում ենք եւ հաջողությունների, եւ անհաջողությունների պատասխանատվությունը»,- Aravot.am-ին ասաց հանրապետական պատգամավոր Գագիկ Մինասյանը` անրադառանալով «Ազատություն» ռադիոկայանի եթերում նախկին արտգործնախարար, ԲՀԿ համամասնական ցուցակի երկրորդ հորիզոնականը զբաղեցնող Վարդան Օսկանյանի հայտարարություններին: Հիշեցնենք, որ վերջինս ասել էր թե նախորդ չորս տարիներին իշխող քաղաքական կոալիցիան ձեւական է եղել, եւ Հանրապետականն էլ արել է այն ինչ ցանկացել է, ուստի երկրում առկա սոցիալ-տնտեսական ծանր վիճակի պատասխանատվությունն ամբողջությամբ Հանրապետականի վրա է: Գագիկ Մինասյանը հակված է կարծել, որ դա Օսկանյանի անձնական կարծիքն է, որը ինքը չի մեկնաբանում: «Ես համոզված եմ նաեւ, որ ԲՀԿ-ն այսօր եւս, ինչպես տարիների ընթացքում, չունի խնդրին այնպիսի մոտեցում, ինչպիսին դրսեւորել է պարոն Օսկանյանն, այն պարզ պատճառով, որ եթե ունենար այդպիսի դիրքորոշում, այսօր դուրս կգար կոալիցիայից»,- ասաց մեր զրուցակիցը` հավելելով, որ իր համոզմամբ` «Օսկանյանի գնահատականները ընդամենը նպատակ են հետապնդում վարկաբեկել ԲՀԿ-ին` մեղադրելով նրանում, որ կուսակցությունը պատեհապաշտությամբ է զբաղվել: Դա անշնորհակալ արարք է ԲՀԿ-ի նկատմամբ»:
Aravot.am-ի հաջորդ հարցին` Վարդան Օսկանյանը հատուկ ներդրվա՞ ծ է ԲՀԿ-ում, ԲՀԿ-ն վարկաբեկելու համար, Գագիկ Մինասյանն ասաց, որ այդ հարցի վերաբերյալ որեւէ տեսակետ չունի: Մեր զրուցակիցը նաեւ հրաժարվեց մեկնաբանել ԲՀԿ համամասնական ցուցակի 19-րդ հորիզոնականը զբաղեցնող Վահան Բաբայանի` մամուլի ակումբներից մեկում այսօր արած այն հայտարարությունը, որ կոալիցիան, ըստ էության, այլեւս գոյություն չունի` պատճառաբանելով, որ տեղյակ չէ այդ հայտարարությանը:
Նելլի Գրիգորյան
