Թիվ 7 ընտրատարածքում մեծամասնական ընտրակարգով առաջադրված ԱԺ պատգամավոր Սամվել Ալեքսանյանը, երբ նույն ընտրատարածքում առաջադրված Նիկոլ Փաշինյանից հրավեր էր ստացել քաղաքական բանավեճի, ասել էր, որ ժամանակ եւ հավես չունի հրավերն ընդունելու: Այնուամենայնիվ, պարոն Ալեքսանյանը վստահեցրել էր, որ այդ ընտրատարածքում ինքն է հաղթելու, «Փարվանայում» քեֆ է անելու եւ քանի որ Նիկոլը լավ է խոսում՝ նրան էլ թամադա է դնելու:
Այս առնչությամբ Aravot.am-ի հետ զրույցում ՀԱԿ համակարգող Լեւոն Զուրաբյանը նշեց. «Սամվել Ալեքսանյանին հարցրեք՝ իրեն որտեղի՞ց այդքան վստահություն, որ ինքն է հաղթելու եւ «Փարվանայում» էլ քեֆ է անելու»:
Պարոն Ալեքսանյանը վստահեցրել էր, որ ինքը լավ հարաբերություններ ունի Նիկոլ Փաշինյանի հետ: Պարոն Զուրաբյանը վստահեցրեց, որ ոչ Փաշինյանը, ոչ էլ ՀԱԿ-ն առհասարակ լավ հարաբերություններ չեն կարող ունենալ այս ռեժիմի մաս կազմող այդ գործարարի հետ. «Մենք խնդիր ունենք այս հանցագործ ռեժիմի հետ, որի մի մասն է Սամվել Ալեքսանյանը, իսկ անձնական հարաբերություններ մենք ոչ մեկի հետ չունենք: Ունենք քաղաքական խնդիր, որը լուծում ենք»:
Հռիփսիմե ՋԵԲԵՋՅԱՆ
