Հատվածներ Գյումրիի քաղաքապետ Վարդան Ղուկասյանի հարցազրույցից:
– Պարոն Ղուկասյան, լուրեր են շրջանառվում, որ Դուք հրաժարականի դիմում եք ներկայացրել:
– Ճիշտն ասած, մեզ մոտ նմանատիպ լուրեր չկան, ես չգիտեմ, թե որ սատանայական կառույցներից են այդ լուրերը պտտվում: Բացի այդ, հրաժարականի առիթ չկա, որ մենք հրաժարական տանք:
– Իսկ ընտրությունների արդյունքներն ինչպե՞ս եք գնահատում:
Կարդացեք նաև
– Ժողովուրդն ինքն իր խոսքն ասաց, և այստեղ հավանական է, որ բոլորս էլ մեր մեղքի բաժինն ունենք: Իսկ Գյումրին սոցիալապես ամենավատ վիճակում գտնվող քաղաքներից մեկն է, և իր ապրած կյանքով Գյումրին միշտ էլ ընդդիմություն է եղել: Երբ նայում ենք՝ Խորհրդային Միության ժամանակահատվածից, կոմունիստական հեղափոխություններից սկսած Գյումրին ընդդիմադիր քաղաք է եղել: Հետո քաղաքներում ուրիշ է, գյուղերում ուրիշ է: Բացի այդ, եթե մի թեկնածու երկու ամսվա ընթացքում 14.000 ձայն է հավաքում, իսկ մյուսը՝ 16.000, այդքան շատ տարբերություն չեմ տեսնում:
– Իսկ, ըստ Ձեզ, ընտրություններն արդար և թափանցի՞կ անցան:
– Էդ արդեն դուք պետք է ասեք, դուք: Երբ շատ արդար լինեին ընտրությունները, այլ կլիներ:
– Ինչո՞վ էր, ըստ Ձեզ, պայմանավորված, որ գյուղերում Հանրապետականն էր հաղթում, քաղաքում՝ ԲՀԿ-ն. ԲՀԿ-ի PR-ը լավ կազմակերպելո՞վ:
– Ճիշտն ասած, այստեղ խնդիրներ կան, պետք է քննարկել: Բոլորը պետք է մտածեն, թե ինչով էր պայմանավորված:
– Կարծո՞ւմ եք՝ այս ընտրությունները նոր պատգմավորներով նոր Հայաստան ստեղծելու են:
– Լավ կլինի դա դուք ասեք, բայց ես, ընդհանուր առմամբ, բարետես եմ, լավատես: Եվ ես գիտեմ, որ լավ պետք է լինի, լավ Հայաստան, ուժեղ երկիր, և ես հավատում ու վստահում եմ:
– Պարոն Ղուկասյան, Դուք նշեցիք, որ Գյումրիում, ընդհանուր առմամբ, ընդդիմադիր են, նկատի ունեք, որ ԲՀԿ-ն ընդդիմությո՞ւն է:
– ԲՀԿ-ն շինծու ընդդիմություն է, ինչքան էլ այսօր ընդդիմություն է դարձել: Այն ժամանակ դիմություն էր, դարձավ ընդդիմություն, և այդպես ժողովրդին կարողացավ ապակողմնորոշել:
– Ինչո՞վ եք պայմանավորում չար, սատանայական ուժերի՝ Ձեր պաշտոնի շուրջ նման լուրեր տարածելը:
– Չար ու նախանձ կա մարդկանց մեջ, բայց այդպես է եղել, այդպես էլ կշարունակվի:
Սիրանույշ ՊԱՊՅԱՆ
«Ժամանակ»
