Ինչպես տեղեկացնում է Տավուշի մարզպետարանի ինտերնետային կայքը՝ Տավուշի մարզպետ Արմեն Ղուլարյանը մայիսի 25-ին իր թիվ 49-Ա որոշմամբ մարզի 54 համայնքներում կայանալիք ՏԻՄ հերթական ընտրությունները նշանակել է 2012թ. սեպտեմբերի 23-ին: Մարզպետի որոշման մեջ այն համայնքների թվում, որտեղ այդ օրը պետք է կայանան համայնքի ղեկավարի եւ ավագանու ընտրություններ, նշված է նաեւ «Թովուզ» համայնքը: Զարմանալի է, որ հիշյալ որոշման վերեւի մասում մարզպետը այդ համայնքի անվանումը նշել է «Տավուշ», իսկ ներքեւի մասում՝ «Թովուզ»:
2006թ. հունիսի 13-ին ընդունված « ՀՀ վարչատարածքային բաժանման մասին» օրենքով «Թովուզ» գյուղը ստացել է իր պատմական, հայեցի անունը՝ «Տավուշ» : Մարզպետը խախտել է նշված օրենքը՝ իր որոշման մեջ նշելով գյուղի նախկին,օտարահունչ անվանումը:
Գյուղի վերանվանումից 6 տարի անց Տավուշ գյուղի միջնակարգ դպրոցի կնիքի վրա դեռեւս «Թովուզ» օտարահունչ անունն է: Մարզի հանրակրթական դպրոցները գտնվում են մարզպետարանի ենթակայության ներքո: Տավուշի դպրոցի տնօրեն Արաքսյա Կլեկչյանն ասաց, որ կնիքը փոխելու հարցով ինքը երկու անգամ Տավուշի մարզպետարան է գնացել, սակայն հարցի լուծումը ձգձգվել է:
Կարդացեք նաև
Ոսկան ՍԱՐԳՍՅԱՆ
