Երեւանի Կենտրոն եւ Նորք-Մարաշ վարչական շրջանների դատարանը՝ դատավոր Արշակ Վարդանյանի նախագահությամբ, հունիսի 4-ին Կարեն Կնյազյանին դատապարտեց 3 տարվա ազատազրկման: Ըստ «Փաստինֆո» գործակալության, Կ. Կնյազյանին մեղադրանք է առաջադրվել այն բանի համար, որ նա աշխատելով ՀՀ ԿԱ ՊԵԿ Նոր Նորքի հարկային տեսչության կանխատեսումների եւ հավաքագրումների բաժնի ավագ հարկային տեսուչ եւ հանդիսանալով պաշտոնատար անձ, դիտավորությամբ ուրիշի առողջությանը պատճառել է ծանր վնաս՝ կյանքին վտանգ սպառնացող (ՀՀ քրեական օրենսգրքի 112 հոդվածի առաջին մաս):
Գործով տուժող Մերուժան Դավթյանը դիմում էր հղել դատարանին, խնդրելով գործը քննել իր բացակայության պայմաններում: Նա նշել էր, որ պնդում է իր նախաքննական ցուցմունքները եւ չի առարկում գործն արագացված դատաքննության կարգով քննելու դեմ, միաժամանակ խնդրել է դատարանից կայացնել հնարավորինս մեղմ դատավճիռ:
Նույն աղբյուրի համաձայն, ամբաստանյալի պաշտպան Կարեն Քամալյանը միջնորդել էր գործը քննել արագացված դատաքննության կարգով, հաշվի առնելով, որ ամբաստանյալն իրեն լիովին մեղավոր է ճանաչում մեղսագրվող արարքը կատարելու մեջ եւ խորապես զղջում կատարվածի առնչությամբ: Արագացված դատաքննության կարգով գործը քննելու դեմ չառարկեց նաեւ մեղադրող Աշոտ Նադոյանը, եւ դատարանը բավարարեց միջնորդությունը:
Ըստ գործի նյութերի, ամբաստանյալը հանկարծակիի է եկել՝ հայտնաբերելով, որ «սիրունիկը» հակառակ սեռի ներկայացուցիչ չէ, այսինքն՝ տղամարդ է եւ նրան հասցրել կյանքին վտանգ սպառնացող վնաս:
Կարդացեք նաև
Մեղադրող եւ պաշտպանական կողմերը դատարանի ուշադրությունը հրավիրեցին այն հանգամանքների վրա, որ ամբաստանյալը նախկինում դատապարտված չի եղել, նրա խնամքին են գտնվում թոշակառու ծնողները, կինն ու երեք անչափահաս երեխաները: Նշվեց նաեւ, որ ամբաստանյալը տառապում է շաքարախտով: Ըստ պաշտպան Կ. Քամալյանի, դեպքը տեղի է ունեցել «հանգամանքների պատահական բերումով»՝ հակառակ կողմի «հակաօրինական եւ հակաբարոյական գործողությունների արդյունքում»:
«Առավոտ» օրաթերթ
