«Ցավոք, ոչ մի քայլ Վահե Ավետյանին չի կարող վերադարձնել, այդ անդառնալի կորուստը մնալու է Ռուբեն Հայրապետյանի խղճին, կապված է մնալու նրա անվան հետ: Նրա մանդատը վայր դնելու փաստը չի սփոփելու Վահեի ընտանիքին, նրա երեխաների կրկնվող հարցին՝ ո՞ւր է հայրիկը, հայրիկիս եմ ուզում, պատասխան չի տալու: Հասարակությանն էլ չի սփոփելու, բայց նրա կողմից այս քայլը, որը անկախ այն բանից ` նախագահի ճնշմամբ է եղել, թե՝ ոչ, ճիշտ էր»,- Aravot.am-ի հետ զրույցում ասաց «Ժառանգություն» խմբակցության նախկին պատգամավոր Անահիտ Բախշյանը:
Նրա կարծիքով, Հայրապետյանի որոշման հարցում դեր խաղաց նաեւ հասարակության ընդվզումը.« Այս օրերին քաղաքացիական ընդվզման տարբեր դրսևորումները, վանկարկումներն ու երթերն անպայման խաղացին իրենց որոշիչ դերը, և դրանք արդեն լուրջ հետագիծ են ունենում: Այստեղ շատ որոշիչ դեր ունեցան նաև Վահե Ավետյանի նկարից ժպտացող սպայի, երիտասարդ, կենսախինդ աչքերը, որոնք մեղադրում էին բոլոր իրեն նայողներին: Հնարավոր է նաև, որ այդ ժպիտն է ստիպել նման որոշում կայացնել»:
Հիշեցնենք, որ այսօր ՀՀ նախագահի նստավայրից դուրս գալուց հետո Ռուբեն Հայրապետյանը տարածել է իր հրաժարականի մասին տեղեկացնող հայտարարությունը:
Արփինե ՍԻՄՈՆՅԱՆ
Կարդացեք նաև
