Երեկ Կիրովի անվան Մանկական զբոսայգում «Դինգո» կենդանասերների խումբը կազմակերպել էր կավճանկարչության միջոցառում. երեխաները նկարում էին իրենց սիրելի կենդանիներին:
«Դինգո» խմբի անդամ Քրիստինա Ադումյանն Aravot.am-ի հետ զրույցում ասաց, որ հերթական միջոցառման նպատակն է` Հայաստանում զարգացնել «մի գնիր, այլ որդեգրիր» գաղափարը: Խմբի անդամները վերցնում են փողոցային անօգնական կենդանիներին, հիմնականում` շներին, իրենց ֆինանսական միջոցներով բուժում նրանց և հանձնում օրավարձով խնամակալության:
«Եղել են դեպքեր, որ ժամանակավոր խնամողներն են որդեգրել շներին, քանի որ հաճույք են ստացել կենդանու հետ շփվելուց: Ներկայումս օրավարձով ապրում է մոտ 30 շուն, հիմնականում` ձագեր: Եթե նրանց խնամքի համար օրական հազար դրամ չվճարենք, դրսում երկու օրից ավել չեն ապրի»,-ասաց Քրիստինան և հավելեց, որ կենդանասերները հիմնականում վերցնում են հիվանդ կենդանիներին. «Ցավոք, ֆինանսական միջոցները թույլ չեն տալիս բոլորին օգնել»:
Քրիստինա Ադումյանը պատմեց, որ վերջերս` Մաշտոցի պուրակի իրադարձություններից հետո պուրակում հայտնվել էր մի վիրավոր շուն, որին կամավորներից մենը խնամում է արդեն 4 ամիս: Շանը Բուտիկ են անվանել: Իսկ Օվսաննա Հովսեփյանը որդեգրել է շանը և կատվին միաժամանակ. ի դեպ, կատուն խուլ է:
Կարդացեք նաև
Միջոցառմանը ներկա էր նաև որդեգրած շներից մեկը: Շան տերը` Աշոտ Վարդանյանն Aravot.am-ի հետ զրույցում ասաց, որ Մաթիլդային վերցրել են 3 տարի առաջ` Մոսկովյան փողոցից. «Շանը տարանք անասնաբույժի մոտ, ով հաստատեց կենդանու առողջ լինելը և կատարեց անհրաժեշտ պատվաստումներ: Առհասարակ, հայկական մենթալիտետի համաձայն` ուզում են պարտադիր ցեղական շուն պահեն: Հավանաբար, իրենց որոշակի բացերը շան ցեղատեսակով են ուզում լրացնել»,-հավելեց պարոն Վարդանյանը:
Լուիզա ՍՈՒՔԻԱՍՅԱՆ
