ՀՅԴ Շիրակի մարզային գրասենյակի պատասխանատու Գևորգ Ալեքյանը մեզ հետ զրույցում տեղեկացրեց, որ իրենք բազմաթիվ ահազանգեր են ստացել Գյումրիում կատարվող ընտրախախտումների վերաբերյալ, և իրենց շտաբի աշխատակիցներին հաջողվել է որոշակի փաստեր ձեռք բերել: «Առավոտ ժամը 10.30-11.00-ի սահմաններում մեր տղաների կողմից Բուլվարային թաղամասում 45-644 համարանիշով Պազ ավտոբուս է հայտնաբերվել, որի մեջ ցուցակով ընտրակաշառք է բաժանվել թե ավագանու անդամության թեկնածուի համար, և պտտվել է նաև քաղաքապետի թեկնածուի` Սամվել Բալասանյանի անունը: Ավագանու թեկնածուի բուկլետում կա նշված հեռախոսահամար, ցուցակներում էլ նշված է ընտրության մասնակիցներ անունը ազգանունները, որոնց ցուցակով տեղափոխում, տանում են ընտրատեղամաս և էդ փաստաթղթերը մեզ մոտ են (տես լուսանկարում): Իսկ ընտրակաշառք բաժանող կինը, գումարը նրա մոտ է եղել , փախել է , մեր տղաները չեն ուզել վազել հետևից-բռնել»,- ներկայացրեց Գևորգ Ալեքյանը:
Ըստ նրա, շրջանառվող լուրերի համաձայն, ավտոբուսից բաժանվել է 5 հազարական դրամ: Ավագանու թեկնածուն, ով իր բուկլետի վրա հեռախոսահամար էր թողել , Մերուժան Գաբոյանն է, որը ավագանու անդամ է առաջադրվել Սամվել Բալասանյանի սատարած «Աշխատանք և արժանապատվություն« թիմային նախաձեռնությամբ:
Դաշնակցականները չեն դիմել իրավապահներին, քանի որ իրենց նպատակը եղել է դիմացինին սթափեցնելը: «Ուղղակի ամոթ է, ընտրակեղծիքների դեմ խոսում են նրանք, ովքեր առաջինն են գնում ընտրակեղծիքների»,-ասաց ՀՅԴ ղեկավարը:
Կարդացեք նաև
Նունե ԱՐԵՎՇԱՏՅԱՆ
