Սեպտեմբերի 23-ին կայացած ՏԻՄ ընտրությունների հետ կապված Տավուշի մարզի թիվ 40 ընտրատարածքում զավեշտալի դեպք է եղել: Սահմանամերձ Դովեղ գյուղի բնակիչ Ա. Դ.-ն ներկայանալով թիվ 40 ընտրատարածքային ընտրական հանձնաժողով (քաղաք Նոյեմբերյան), հանդես է եկել որպես Դովեղի ավագանու թեկնածու եւ ցանկացել իր վստահված անձի համար հանձնաժողովից փաստաթուղթ ստանալ:
Հանձնաժողովում զարմացել են, քանի որ ավագանու թեկնածուն իրենց մոտ գրանցված չի եղել: Դովեղցին իր հերթին զարմացել է, քանի որ ինքը բանկում ավագանու անդամության համար 10 հազար դրամ կանխավճար է մուծել, ոստիկանությունից էլ տեղեկանք ստացել, որ վերջին 6 ամսում բնակվել է ՀՀ-ում: Նա կարծել է, որ այդքանը բավարար է ավագանու թեկնածու դառնալու համար:
Վերջում երիտասարդը հետաքրքրվել է, թե կարո՞ղ է ետ ստանալ իր կողմից որպես ընտրական գրավ մուծված 10 հազար դրամը: ԸԸՀ-ում ձախողակ թեկնածուին հայտնել են, որ դա հնարավոր չէ:
Ոսկան ՍԱՐԳՍՅԱՆ
