ՀՀ կառավարությունը մերժել է 2013 թվականի պետական բյուջեում Ազգային ժողովի ֆինանսավորումն ավելացնելու վերաբերյալ ՀՀԿ խմբակցության առաջարկները: ՀՀԿ-ն, մասնավորաբար, առաջարկել էր արտասահմանյան գործուղումների գծով ծախսերն ավելացնել 50 մլն դրամով, մեքենաների եւ սարքավորումների ընթացիկ նորոգման ծախսերը՝12 մլն դրամով, տրանսպորտային նյութերը՝ 30 մլն դրամով, տրանսպորտային միջոցների ձեռքբերման համար հատկացնել 180 մլն դրամ, աշխատողների աշխատավարձերը եւ հավելավճարներն ավելացնել 12 մլն դրամով, Ազգային ժողովի նիստերը հեռուստատեսությամբ եւ ռադիոյով հեռարձակելու նպատակով հատկացնել 80 մլն դրամ: Ըստ news.am-ի, ՀՀ կառավարության պաշտոնական պատասխանի մեջ նշված է, որ այդ ծախսային ուղղություններն առաջնահերթ չեն:
ՀՀ ԱԺ ֆինանսավարկային եւ բյուջետային մշտական հանձնաժողովի նախագահ, ՀՀԿ-ական Գագիկ Մինասյանից Aravot.am-ը հետաքրքրվեց՝ խորհրդարանի ՀՀԿ-ական մեծամասնությունը շա՞տ է վիրավորվել հարազատ ՀՀԿ-ական կառավարության մերժողական վերաբերմունքից: «Չէ: Ես չեմ կարծում, որ ցանկացած խմբակցության առաջարկ, լինի նա իշխանության մեջ, պետք է միշտ ընդունվի»,- ասաց պարոն Մինասյանը:
Մեր զրուցակիցը ձեռնպահ մնաց այլ մեկնաբանություններից, քանի որ կառավարության ներկայացրած հիմնավորումներին ծանոթ չէր: Ասաց, որ այդ իրողությունը կարող է քննարկման առարկա դառնալ միայն կառավարության հիմնավորումների հրապարակումից հետո:
Կարդացեք նաև
Նելլի ԳՐԻԳՈՐՅԱՆ
