Ըստ ԱԻՆ ներկայացուցչի՝ Աշտարակում այսպիսի հարցադրմամբ թիկունք ունեցող օբյեկտատերերը դուրս են հրավիրել իրենց աշխատակիցներին
Ինչպես տեղեկացրել ենք, այսօր Շիրակի մարզպետարանում ԱԻՆ ենթակայության տակ գտնվող կառույցները 2 ժամ շարունակ հաշվետվություն ներկայացրեցին 2012 թվականին մարզում գրանցված արտակարգ դեպքերի ու առհասարակ իրենց կատարած աշխատանքների մասին: Խոսք ընկավ նաև արտադրական վտանգավոր օբյեկտների մասին ու պարզվեց, որ այնտեղ մուտք գործելն ու փորձաքննություն անցկացնելը երբեմն ռիսկի հարց է: Հատկապես այն օբյեկտատերերը, որոնք այսպես ասած թիկունք ունեն, կարող են դուրս հրավիրել տեխնիկական անվտանգության աշխատակիցներին:
Այս թեմայով ելույթ ունեցավ տեխնիկական անվտանգության ազգային կենտրոնի իրավաբանական բաժնի աշխատակիցներից մեկը` փաստելով, որ Շիրակի մարզում փաստացի 463 արտադրական վտանգավոր օբյեկտ կա, որից շահագործվում է 416-ը : Զեկուցողը դժգոհեց, որ նկատելի է անպատժելիության մթնոլորտ, երբեմն օբյեկտատերը չի ուզում փորձաքննության ենթարկել իր օբյեկտը, չնայած որ «Տեխնիկական անվտանգության ապահովման մասին» օրենքը նախատեսում է առնվազն տարին մեկ անգամ փորձաքննության ենթարկել օբյեկտը, խախտելու դեպքում էլ 1 միլիոն դրամի պատիժ է սահմանում: Շիրակի մարզային հրդեհային ծառայության պետ պարոն Խաչատրյանի մոտ բնական մի հարց առաջացավ, թե ինչո՞ւ են տեխնիկական անվտանգության ազգային կենտրոնի աշխատակիցները մարզի 463-ից միայն 313-ում ստուգումներ անցկացրել: «Բա մյո՞ւս 150-ը»:
Ու մինչև զեկուցողը փորձում էր պարզաբանել, բացատրել, որ 2006 թվականին ընդունված օրենքի համաձայն իրենք ստուգելու իրավունք չունեն, այլ պիտի փորձաքննեն, օրինակ ասենք կարուսելի դժբախտ դեպքերը , հրշեջ ծառայության պետը բացարձակ չհամոզվեց: Նա իր օրինակով բացատրեց, որ իր կառույցը իրավունք ունի մտնել արտադրական վտանգավոր այն օբյեկտները, որոնց տարեկան շրջանառությունը գերազանցում է 70 միլիոնը: Նախարարությունից ժամանած «Սեյսմիկ պաշտպանության ծառայություն» գործակալության պետ Հրաչյա Պետրոսյանը վիճակը հարթելու համար՝ երկու կառույցների ներկայացուցիչներին էլ հարցրեց, թե եղե՞լ են դեպքեր, երբ օբյեկտի տերը հարցնի «Դու ո՞վ ես , չգիտե՞ս, որ ես այսինչի ախպոր տեղն եմ, կամ այսինչի բաջանաղը, ինչո՞ւ ես եկել»: Երկու կառույցների ներկայացուցիչներն էլ փորձեցին հավաստիացնել, որ Շիրակի մարզում նման դեպքեր չեն եղել: Նախարարության պաշտոնյան հիշեց, որ անցած տարի Աշտարակում նմանատիպ հաշվետվություններ լսելիս, այնտեղ իրեն դժգոհել են, որ կան այդպիսի օբյեկտատերեր: Դահլիճում նստածներից մեկը նստած տեղից կատակեց. «Մեր մարզում էլ շատ կա, ուղղակի մենք ծախող չենք»: Արդյունքներն ամփոփելիս նախարարության ներկայացուցիչը հատուկ շնորհակալություն հայտնեց ԱԻՆ-ի բոլոր աշխատակիցներին` ցածր աշխատավարձով աշխատելու համար: «Հասկանալի է, որ դուք աշխատում եք խղճի դիմաց, որպեսզի մեր երկիրը կայուն լինի», – ասաց Հրաչյա Պետրոսյանը` իրենց ենթակայության տակ գտնվող կառույցների հաշվետվությունները գնահատելով դրական:
Կարդացեք նաև
Նունե ԱՐԵՎՇԱՏՅԱՆ
