Այսօր նախագահի թեկնածու Րաֆֆի Հովհաննիսյանը «Ուրբաթ» ակումբում պատահաբար հանդիպեց սպանված զինծառայողների ծնողներին: Մասնավորապես, բանակում պաշտոնական վարկածով «ինքնասպան» եղած Արտակ Նազարյանի մոր` Հասմիկ Հովհաննիսյանի հետ մի քանի րոպե առանձնազրույց ունեցավ: Անհասկանալի էր, թե ինչ շշնջաց Րաֆֆի Հովհաննիսյանը կնոջ ականջին, բայց դրանից հետո Արտակ Նազարյանի մոր աչքերը թրջվեցին, սկսեց լացել:
Aravot.am-ը տիկին Հասմիկից հետաքրքրվեց, թե ի՞նչ էին խոսում պարոն Հովհաննիսյանի հետ: Հասմիկ Հովհաննիսյանի խոսքերով` «Ես նրան ասացի, որ կուզենայի ձեր ծրագրում բարեփոխումներ լիներ բանակում եւ իրավական համակարգում: Որ էս երկրում բացառվի այլեւս բանակում որեւէ հանցագործություն եւ ապօրինություն»: Րաֆֆի Հովհաննիսյանը, ըստ տիկին Հասմիկի, խոստացել է` «Ես ամեն ինչ կանեմ»:
Հասմիկ Հովհաննիսյանը նաեւ ասաց, որ գործը դատական փուլում է գտնվում եւ մինչ օրս որեւէ քայլ, որեւէ աջակցություն որեւէ ղեկավարի կողմից չի եղել. «Որեւէ կուսակցություն չի կարողացել մեզ` մայրերիս աջակցել: Իսկ խոստումներ միշտ էլ լինում են»:
Հռիփսիմե ՋԵԲԵՋՅԱՆ
