Այսօր Շիրակի մարզի գյուղեր, ինչպես նաև Գյումրի էր այցելել ՀՀ նախագահի թեկնածու Հրանտ Բագրատյանը: Ի տարբերություն Սերժ Սարգսյանի հանրահավաքի, որտեղ ներկա-բացակա անելու սպառնալիքով բոլոր պետական կառույցների աշխատակիցներին հարկադրել էին գալ Գյումրու թատերական հրապարակ, և տարբերություն Րաֆֆի Հովհաննիսյանի, ում լսելու համար թատրոնի դահլիճում մի ոտքի տեղ անգամ չէր մնացել, Հրանտ Բագրատյանի հետ զրուցելու էին եկել մի քանի տարեց գյումերցիներ:
Նրա հանդիպումը «Հոկտեմբեր» կինոթատրոնի միջանցքում էր, որտեղ նա հարզացրույց տվեց լրագրողներին, այնուհետ սկսեց պատասխանել երկրի տնտեսությամբ հետաքրքրված բողոքավոր մի քանի տարեցների հարցերին: Նրան ուղղված հարցերը բազմազան էին, օրինակ` ինչո՞ւ են այդքան մեծ քանակությամբ պատգամավորների պահում, ինչո՞ւ ընտրողը չի կարող հետ կանչել մատը մատին չխփող պատգամավորին, ինչո՞ւ նախարարությունների թիվը չեն կրճատում, ի՞նչ է անելու մարզպետարանը, այն ավելորդ , փող ուտող կառույց է: Կային բողոքներ ուղղված նաև մաքսայինի դեմ, օրինակ` ինչո՞ւ շանս չեն տալիս իրենց արտադրանքը Ռուսաստանից ներկրելու:
Եվ մինչ Հրանտ Բագրատյանը իրեն ուղեկցող տղային կանչում էր, ասելով` տղա ջան, մի հատ ծրագիրս բեր ու այն հրամցնում էր մարդկանց, մի ծերունի զայրացած մոտեցավ ու մեղադրանքներ հնչեցրեց վարչապետ Բագրատյանի հասցեին: Նա ասաց, թե երկրաշարժից հետո փլված տան դիմաց ստացած փոխհատուցումը` փողի տեսքով գցել են բանկը ու հիմա չի կարողանում բանկից ստանալ այդ գումարը: «Հարգելի Բագրատյան, գոնե էդ բանկի փողերը ձեռքներիցս չառնեիք, կորցրած տների փողերը գոնե չտանեիք, հիմի դու գուզես պրեզիդենտ էղնիս, նորից էղածը դաբավկա էնես վրեն», – ասաց ծերունին ու ձեռքը թափ տալով ` փորձեց հեռանալ: Հրանտ Բագրատյանն ի սրտե զայրացավ ` կանչելով . «Արի էստեղ, մի գնա, ի՞նչ իրավունք ունես ինձ էդպես բան ասելու»: Թեկնածուն այնուհետ շարունակեց.« Հիմա լսի, 91 թվի դեկտեմբերի 4-ին Ելցինը հայտարարեց, որ Խնայբանկի հետ գործ չունեք. Ռուսաստանը փող չի տալիս: Բայց էնքան թասիբ ենք ունեցել պատերազմի մեջ գտնվելով, որ 91 թվին վարչապետ Բագրատյանն ասում է` ես էդ պարտքը ընդունում եմ, գրում եմ պետական պարտք ու հետ եմ տալու: Դրանից հետո պարտքը մի անգամ ինդեքսացնում են: Հիմա եկել եմ, ասում եմ` պետությունը հիմա կոպեկներ է տալիս, քո խոսքը խնաբանկի ավանդների մասին է , չէ՞: 50 անգամ պակասացրեց, հիմա հետ է տալիս , ասում եմ` կդարձնեմ աբլիգացիա, որ փող էլ չունենամ, կթողնեմ քո ժառանգորդին, մինչև կես միլիարդ դոլար կվերադարձնեմ: 56-րդ կետը նայի ծրագրիս, Էստոնիան օրինակ ասեց` ես թքած ունեմ, էդ սովետի փողերն է, չենք տալիս, իսկ մենք էդքան թասիբ ենք ունեցել, որ 93 թվին դա համարել ենք պետական պարտք, ավանդների թղթերը արխիվացրել ու պահել են »:
Հրանտ Բագրատյանի պարզաբանումը չգոհացրեց պապիկին, ով նորից դժգոհեց, որ ինքը 80 տարեկան է, ասենք ժառանգ էլ չունի, ո՞վ պիտի ստանա իր գումարը: «Ոչ Ձեր կառավարությունն էր մի բան, ոչ էլ թազա եկացողն է մի բան , գործ անող չեք էլի»,-զայրացած ասաց պապիկը ու հեռացավ:
Կարդացեք նաև
Ի դեպ, Հրանտ Բագրատյանը բնակիչների հետ հանդիպման ժամանակ անդրադարձավ նաև Պարույր Հայրիկյանի հետ միավորվել-չմիավորվելու խնդիրն` նշելով, որ Սահմանադրական դատարանին դիմում ներկայացնելը, այնուհետ հետ վերցնելը, դա թամաշություն է , իսկ թամաշությունով զբաղվելու փոխարեն գերադասում է քարոզարշով զբաղվել: Լրագրողների հետ զրույցում էլ նշեց, որ նախ պիտի համոզվի, որ նրանք, ում սեղան է նստում, ընդդիմություն են, այնուհետ մտածի միավորվելու մասին:
Հրանտ Բագրատյանի ու գյումրեցիների հարց ու պատասխանի մասին առավել մանրամասն ընթերցեք վաղվա «Առավոտ» օրաթերթում:
Նունե ԱՐԵՎՇԱՏՅԱՆ
Առավոտի րաֆֆիապաշտությունն ու հրանտատյացությունն օրեցօր ավելի արտահայտված է դառնում:
հաճույք եք ստանում Բագրատյանին կծելուց?
Այս անգամ ընդդիմադիրներին՝ Ռաֆիին և Բագրատյանին ժողովուրդը շատ լավ է ընդունում ու մեծ հույսեր է կապում մանավանդ Ռաֆֆիի հետ էսպես որ գնա Սերժը ընտրակեղծիքներովվ էլ չի հաղթի:
Վրաստանի պատմությունը Հայաստանում էլ կկրկնվի: