ՀՀ վերաքննիչ քաղաքացիական գործերով դատարանը՝ նախագահող դատավոր՝ Գ. Մատինյան, դատավորներ Լ. Գրիգորյանի եւ Ա. Թումանյանի մասնակցությամբ, ավարտեց իրավաբան Աննա Երիցյանի գործով վերաքննիչ բողոքի քննությունը: Նա դատարան էր դիմել ընդդեմ «Հուսալի պաշտպանություն» ՍՊԸ տնօրեն Պետրոս Արզաքանցյանի:
Անցյալ տարվա նոյեմբերի 14-ին Կենտրոն եւ Նորք-Մարաշ վարչական շրջանների ընդհանուր իրավասության դատարանը մասնակի բավարարել էր Աննա Երիցյանի հայցը եւ պարտավորեցրել էր ՍՊԸ-ին՝ վճարել նրա երկու ամսվա աշխատավարձը՝ 65.000 ՀՀ դրամի չափով: Մինչդեռ Աննա Երիցյանը հայտնել էր, որ փաստաբանական ընկերության տնօրեն Պետրոս Արզաքանցյանը չի վճարել իր 7 ամսվա կատարված փաստացի աշխատանքի դիմաց՝ 227.500 դրամ:
Ի դեպ, Աննա Երիցյանի եւ «Աշխատանք Մեգա» կադրային կենտրոնի միջեւ կնքվել էր վճարովի ծառայությունների մատուցման պայմանագիր, համաձայն որի՝ Ա. Երիցյանը ներկայացել է «Հուսալի պաշտպանություն» փաստաբանական գրասենյակ՝ որպես իրավաբանի թափուր հաստիքի հավակնորդ: Համաձայն փաստաբանական գրասենյակի եւ իրավաբանի պայմանավորվածության, նրանք mail.ru, ինչպես եւ skaype ծրագրով հաղորդակցվել են:
ՀՀ վերաքննիչ դատարանը մերժեց Ա. Երիցյանին, գտնելով, որ փաստերի հիմնավորման եւ ապացուցման պարտականությունը տվյալ դեպքում կրում է Ա. Երիցյանը, որ «Հուսալի պաշտպանություն» ՍՊԸ-ում 7 ամիս՝ ամսական 80.000 դրամով աշխատելու վերաբերյալ Ա. Երիցյանը «որեւէ վերաբերելի եւ թույլատրելի ապացույց» չի ներկայացրել:
Վերաքննիչ դատարանը ընդհանուր իրավասության դատարանի անցյալ տարվա նոյեմբերի 14-ի վճիռը թողեց օրինական ուժի մեջ:
Ա. Երիցյանը մտադիր է մեկամսյա ժամկետում բողոք ներկայացնել ՀՀ վճռաբեկ դատարան:
Ռուզան ՄԻՆԱՍՅԱՆ
