Ավագանու թեկնածուն անձամբ հսկում է ընտրությունները
Շենգավիթ վարչական շրջանում գտնվող 139 11/25. 11/26 դպրոցի շրջակայքում 77…777 համարանիշով «Մերսեդես-Բրաբուս» ավտոմեքենայով ինչ-որ անձ գումար է բաժանում. այս մասին ՀՅԴ գրասենյակի թեժ գծին է տեղեկացրել տարեց մի ընտրող, որը մեքենայի միայն թվերն է կարողացել տեսնել:
Այս մասին Aravot.am-ին տեղեկացրեցին ՀՅԴ գրասենյակից;
Թեժ գծին նաեւ ահազանգել են, որ Քանաքեռ-Զեյթունի 3/17 ընտրատարածքում եւս գումար է բաժանում պաշտպանության նախարարության ՊՆ պետհամարանիշի ավտոմեքենայով ինչ-որ անձ, սակայն թվերը չեն կարողացել արձանագրել:
Կարդացեք նաև
Նույն թեժ գծի տվյալներով, 8-րդ բուժմիավորման աշխատակիցներ են զանգահարել, եւ տեղեկացրել, որ ինչ-որ անձինք զանգահարում են ու ճշտում` գնացե՞լ են քվեարկության, թե` ոչ:
Աէրացիայի 169 դպրոցում տեղակայված 12/20 ընտրատարածքից ահազանգ է ստացվել, ըստ որի ընտրատեղամասում ռազբորկա է տեղի ունենում հանձնաժողովի անդամներից մեկի եւ ավագանու Հանրապետական թեկնածու Հայրապետ Հայրապետյանի միջեւ: Ըստ ահազանգի, Հայրապետյանը փորձում է վերահսկել ընտրությունների ընթացքը ու անընդհատ ներս ու դուրս է անում:
Aravot.am-ը այցելեց նշված ընտրատեղամաս, սակայն տարածքում ամեն ինչ խաղաղ էր: Մեզ հետ զրույցում հանձնաժողովի անդամ Եսայի Հարությունյանը վստահեցրեց, որ մի թեթեւ վիճաբանություն է տեղի ունեցել Հայրոյի` նույն Հայրապետ Հայրապետյանի հետ. «Նա անընդհատ գալիս էր տեղամաս, ինչ-որ բաներ խոսում, գնում: Քանի որ ինքն իրավունք չունի տեղամասում գտնվել, ես էլ հանձնաժողովի նախագահին ասացի, որ դրան զգուշացնի: Այդ զգուշացնելուց հետո, նա գնաց դուրս»:
ՀՅԴ-ի թեժ գծին են նաեւ ահազանգել, որ 1/28 ընտրատեղամաս մեծ խմբով մարդիկ են տանում, եւ ըստ խոսակցությունների, այդ մարդիկ տեղի բնակիչներ չեն` ախալքալակցիներ են:
Նելլի ԲԱԲԱՅԱՆ
