Այսօր 150 դրամ ուղեվարձի դեմ պայքարող ակտիվիստներին առանձին ցույցով միացավ նաեւ «Հայազն» կուսակցությունը, որը որոշել էր նամակներ հանձնել Տարոն Մարգարյանին եւ կառավարության շենքում էլ՝ Տիգրան Սարգսյանին: Սակայն երբ ցուցարարներն ուզում էին առաջանալ դեպի քաղաքապետարանի մուտք, ոստիկանները շղթա կազմեցին եւ թույլ չտվեցին առաջ գնալ: Ոստիկանների բացատրելով՝ ակտիվիստները խաթարում են քաղաքապետարանի բնականոն աշխատանքը: «Հայազնի» անդամները չհամաձայնեցին. «Մենք որեւէ կերպ քաղաքապետարանի աշխատանքին չենք խանգարում»:
Ոստիկանները սկսեցին բանակցություններ վարել ակցիայի կազմակերպիչների հետ եւ այլ տեղ մատնանշել՝ ցույցի համար: «Հայազնի» անդամ Արմեն Մկրտչյանի խոսքերով՝ «Ո՞նց չի կարելի, դա հանցագործություն է: Ես իրավաբան եմ, Քրեական, Վարչական եւ այլ որեւէ օրենսդրություն ցույց կտա՞ք, որ քաղաքապետարանի մուտքի մոտ արգելվում է պիկետ անել»: Ի պատասխան՝ ոստիկանը սկսեց վիրավորել նրան՝ ասելով՝ «Եսիմ որտեղ եք սովորել, եկել ասում եք իրավաբան եմ»:
Ավելի ուշ ակտիվիստները հենց կանգնած տեղում բարձրաձայն կարդացին իրենց նամակը եւ շարժվեցին դեպի տրանսպորտի նախարարության, կառավարության շենք:
«Հայազնի» անդամ Արմեն Հովհաննիսյանը հարցին, թե ինչու են գնում կառավարություն, երբ որոշումը Երեւանի քաղաքապետարանինն է՝ պատասխանեց. «Ճիշտ եք ասում, հասկանում եմ ենթատեքստը, որ Երեւանը տեղական ինքնակառավարման մարմին է եւ, կարծես թե, ինքն իրենով անկախ է, բայց Մաշտոցի պուրակի պայքարին եմ մասնակցել եւ գիտենք, թե այդ ամեն ինչը ինչով վերջացավ: Մոտավորապես լծակները պատկերացնում եմ:Գլխավոր լծակն այստեղ չի, գնում ենք կառավարություն, ելնում ենք պահի պահանջից»:
Կարդացեք նաև
Ցուցարարները «100, 100» գոռալով՝ եւ «Տարոն՝ 150 դրամանոց քիլլեր» ցուցանակներով շարժվեցին Վազգեն Սարգսյանի փողոցով դեպի Հանրապետության հրապարակ:
Մանրամասները՝ տեսանյութերում ավելի ուշ:
Հռիփսիմե ՋԵԲԵՋՅԱՆ
