ԱԻՄ առաջնորդ Պարույր Հայրիկյանի համոզմամբ, ԵՄ-Հայաստան ասոցացման համաձայնագրի ստորագրումը սենսացիա չի կարող լինել եւ սխալ է համաձայնագիրը չհրապարակելը:
«ԵՄ հետ որեւէ համաձայնագրի ստորագրումը չի կարող իր մեջ սենսացիոն բան պարունակել մեզ համար, որովհետեւ Եվրոպան առաջնորդվում է արժեքային համակարգով՝ ի տարբերություն պուտինյան Ռուսաստանի, որը առաջնորդվում է ռուսական կայսրության շահերով: ԵՄ հետ որեւէ համաձայնագիր իր մեջ վատ բաներ չի կարող պարունակել: Կարող են լինել երեւույթներ, չափից ավելի ազատություններ, որոնք ինձ համար էլ էնքան հաճելի չէն: Բայց ԵՄ բոլոր սկզբունքները խարսխված են մարդու իրավունքներին: Մենք Եվրոպայի կարիքը շատ ենք զգում, չհրապարակելը սխալ է, որովհետեւ 10 տոկոսի համակրանքը կարող էր նվազեցնել, բայց ընդհանուր առմամբ ժողովրդին վերաբերող բան կա, պետք է հրապարակվի: Մյուս կողմից՝ այլընտրանք չունենք, այլընտրանքը մեր կործանումն է, այսօր աշխարհաքաղաքական հարաբերությունների պայմաններում կամ ԵՄ, Արեւմուտք, ՆԱՏՕ, կամ աստիճանական կործանում, որի ականատեսն ու մասնակիցն ենք արդեն: Մենք Եվրոպայի կարիքը շատ ունենք»,- այսօր «Զարկերակ» ակումբում ասուլիսի ժամանակ ասաց պարոն Հայրիկյանը:
Հետո պարոն Հայրիկյանը սկսեց զուգահեռներ տանել համաձայնագրի չհրապարակման եւ Րաֆֆի Հովհաննիսյանի քայլերի միջեւ. «Չհրապարակելը նման է Րաֆֆի Հովհաննիսյանի` նախագահի հետ հանդիպման գնալուն, իբրեւ թե ժողովրդի կողմից ընտրված էր, բայց չէր հրապարակում` ինչի մասին էր խոսելու, վերադարձավ, էլի չէր հրապարակում` ինչի մասին էր խոսել: Հուսամ դա այդպիսին չէ»:
Արփինե ՍԻՄՈՆՅԱՆ
